थाय् थासय् दुर्घटना: न्हय्म्ह सित

कालिमाटी चौकी घेराउ

येँ (सन्ध्या टाइम्स)/थौं सुथय् थीथी थासय् जूगु सवारी दुर्घटनाय् लानाः न्हय्म्ह मनू सीगु दु। सुनसरी ओराहवनी लागाय् प्यम्ह, मकवानपुरया टिस्टुङ लागाय् निम्ह व येँया ढुंगाअड्डाय् छम्ह सीगु खः। येँय् जूगु दुर्घटनाय् लानाः सीम्ह विद्यार्थीया थःथिति व क्याम्पसया विद्यार्थीतय्सं कालिमाटी चौकी घेरे यानाः दोषीयात कडा कारवाही यायेत माग यानाच्वंगु दु ।

येँया ढुंगाअड्डाय् थौं सुथय् बा. ३९ प ११९३ नम्बरया मोटरसाइकल व बा. ३२ प १९४६ नम्बरया मोटरसाइकल ल्वानाः ग्वारतुलाच्वंगु इलय् लिउनें वःगु ट्रिपरं क्यलाः मोटरसाइकलया लिउने च्वनावःम्ह मातातीर्थया स्थानीय सिर्जना खड्का सीगु खः। उगु दुर्घटनाय् लाना घाःपाः जूपिं निगः मोटरसाइकलया निम्हं चालकततय्त वीर अस्पतालय् वासः याकातःगु दु। सीम्ह खड्का चालक अपार बिडारीं चले याना वःगु मोटरसाइकलय् च्वना वःम्ह खः ।

ट्रिपरया चालकयात प्रहरीं ज्वनाः कारवाही मयाः धासें स्थानीय मनूतय्सं आक्रोशित जुसें सुथंनिसें हे प्रदर्शन यानाच्वंगु दु। सीम्ह खड्का जनमैत्री क्याम्पसय् बीबीएस ब्वनीम्ह विद्यार्थी खः। थः पासायात गाडीं कयेकाः स्याना बिल धासें क्याम्पसया विद्यार्थीत नं सतकय् कुहां वयाच्वंगु दु। उमिसं कालिमाटी प्रहरी चौकी घेरे यासें दोषीयात कारवाही यायेमाःगु नापं क्षतिपूर्तिया माग यानाच्वंगु दु ।

उखे सुनसरीया छिटाहापाखें मधेलीइ जन्ती वंपिं तयाः लिहां वयाच्वंगु इलय् को. १ त ४५५२ नम्बरया ट्याक्टर ओराहीवनी लागाय् दुर्घटना जुयाः प्यम्ह मनू सीगु दु। उगु दुर्घटनाय् लानाः चालक १८ दँ दुम्ह प्रल्हाद चौधरी, पसुलाल चौधरी, कुसे चौधरी व भारतया हरिलाल साह सीगु खः। थौं सुथय् ३ बजे गाडी नहरय् कुतुं वनाः उगु दुर्घटना जूगु खः।
उकथं हे टिस्टुङय् थौं सुथय् ना. २ ख ८५२५ नम्बरया ट्रक दुर्घटना जुयाः निम्ह मनू सीगु दुसा मेपिं निम्ह घाःपाः जूगु दु ।

मिं नयाः छम्ह मजदूर सित
बारा जिल्लाया जितपुर लागाय् मेटल क्राफ्ट उद्योगय् थौं सुथय् मि च्यागु इलय् मिं नयाः अन ज्या याइम्ह छम्ह मजदूर सीगु दु। प्रहरीं धाः कथं उद्योगय् मि च्यानाः अनया कर्मचारी भारतया उत्तरप्रदेश उरहीइ च्वंम्ह २४ दँया मजदूर विजेद्र सिंह राजपुत सीगु खः ।

मि च्याना मेपिं प्यम्ह मजदूर नं घाःपाः जूगु दु। थौं सुथय् ४ बजे उगु उद्योगय् च्वंगु ग्याँसया पाइप तज्यानाः मिं नःगु खँ प्रहरीं धाःगु दु ।