नेतातय् छेँय् छेँय् भारतीय नेता

भारतय् छापे यायेगु धकाः ठिक्क जुइधुंकूगु मेशिन रिडेबल पासपोर्ट अन्ततः भारतय् छापे मयायेगु धकाः नेपाः सरकारं निर्णय यायेवं उकिया विरोधय् थःपिन तं प्वंकेत भारतीय राजदूत राकेश सुद नेतातय् छेँय् छेँय् ब्वाँय् वंगु दु। वय्कलं प्रधानमन्त्री माधव नेपाल लगायत विपक्षी दलया नेताया छेँय् समेत वनाः उगु पासपोर्ट छापे यायेगु ज्या भारतयात मबिल धकाः थःपिनि असन्तुष्टि प्वंकादीगु दु। भारतीय राजदूतया थ्व सक्रियता थःगु कुटनीतिक ल्याखं अतिकं मिले मजूगु खँ खः। वय्कःया थ्व सक्रियतां पासपोर्ट भारतय् हे छापे यायेमाः धकाः भारतं यानाच्वंगु दावी झीसं न्हापा यानाच्वनागु स्वयां नं अप्वः खतरनाक खः धइगु खँ पुष्टि जूगु दु। भारतीय राजदूतं पासपोर्ट थःगु देशय् छापे याकेगु लागिं नेपाःया परराष्ट्र मन्त्रालययात च्वयातःगु पती थःपिनि सुरक्षा चिउताः समेत व्यक्त यानातःगु दु। नेपालं थःगु देशयात माःगु पासपोर्ट मेगु देशय् छापे यायेवं भारतया सुरक्षाय् खतरा लाइगु खः व भारतीय सुरक्षाया हे कमजोरी खः, उकी नेपालं चिउताः तयेमाःगु आवश्यकता मदु। पासपोर्ट छापे यायेगु ज्या शुद्ध छगू व्यापारिक कारोवार खः। थज्याःगु ज्याय् तकं राजनीतिक मिशन सक्रिय जुयाः पलाः तः वयेगु छगू कथं निर्लज्जताया पराकाष्ठा खः। नेपाःया पासपोर्ट खः, नेपालं उकियात गन न्ह्याः अन छापे याइ। यदि थुलि ज्या तक नं थौं नेपालं थःगु इच्छा कथं याये मदइगु खःसा थ्व देशयात सार्वभौम खः धकाः दावी यायेगु आधार तकं झीके दु धकाः गय् यानाः धायेगु? कर्पिनि देशय् हस्तक्षेप यायेगु हद तकया सीमा हे पुलाः भारतं याःगु थ्व ज्यायात न्ह्याक्व कुंखिउँसां मगाः ।

More Stories Like this