'सरकार हिउसा जक म्याद थप'
संविधानसभाया म्याद थपे यायेत माओवादीया शर्त
येँ (सन्ध्या टाइम्स)/संविधान सभाया मूमू राजनीतिक दलत मध्ये नेकपा (एमाले) व नेपाली कांग्रेसया नेतातय्सं आः खुल्ला रुपं हे जेठ १४ गते संविधान मवइगु जूगुलिं संविधानसभाया म्याद थप यायेमाः धयाहःगु इलय् लाक्क प्रमुख प्रतिपक्षी माओवादीं धाःसा यदि वर्तमान सरकार क्वःथलाः मेगु सरकार दयेकेगु जूसा जक संविधानसभाया म्याद थप याये फइ धयाहःगु दु ।
यदि माधव नेपालया थ्वहे सरकार कायम याना तयेगु खःसा संविधान दयेकेगु लागिं म्याद थप यायेगु ज्याय् थःपिं सहमत मजुइगु खँ माओवादीं धाःगु दु ।
वर्तमान सरकार विघटन जुयाः न्हूगु सरकार दयेकेगु खःसा जक न्हूगु संविधान जारी यायेगु म्याद थपे यायेगु बारे बिचाः याये फइगु खँ माओवादीं धाःगु दु ।
थ्वहे झ्वलय् माओवादीं जिउसा सहमतिपाखें व मखुसा बल प्रयोग यानाः जूसां माधव नेपालया सरका क्वःथलेगु निंतिं न्हूगु रणनीति दयेकूगु खँ सीदुगु दु। सरकार हिलेगु सहमतिया निंतिं दलतलिसे सहलह ब्याका वनेगु व सहमति मजुल धाःसा आन्दोलनया बलं जूसां सरकारक्वःथलेगु रणनीति माओवादीं दयेकूगु खँ धाःगु दु। माओवादीया छम्ह नेतां 'सन्ध्या टाइम्स' लिसे खँ ल्हासें वर्तमान सरकारयात राष्ट्रिय सहमति दयेकाः क्वःथसें राष्ट्रिय सरकार दयेके मफइगु जुल धाःसा संसदय् बहुमत दयेकाः जूसां थ्व सरकार क्वःथलाः न्हूगु सरकार दयेकेगु तयारी कथं पार्टी न्ह्याः वंगु खँ कनादिल ।
थ्वहे दथुइ लिपांगु राजनीतिक अवस्थायात ध्यानय् तया आः गुगु कथं न्ह्याः वनेगु नापं आन्दोलन व वार्तायात गुगु कथं नापनापं यंकेगु धइगु बारे सहलह यायेत थौं च्वनेत्यंगु माओवादी पोलिटब्यूरो बैठक स्थगित जूगु दु। उगु बैठकं आः वइगु मजदूर दिवस कुन्हु सरकारयात निगुगू धक्का लाकेगु ज्याझ्वः दयेकेगु ग्वसाः दुगु खः ।
माओवादी नं वइः सरकारया प्रवक्ता
आःया अवस्थाय् प्रमुख प्रतिपक्षी माओवादीं न्ह्यागु हे आन्दोलन यानाच्वंगु जूसां अन्ततः न्हूगु संविधान जारी यायेगु म्याद थपे यायेत उपिं नं सहमतिइ वइ धइगु खँय् सरकार विश्वस्त दु धकाः सरकारया प्रवक्ता व संचारमन्त्री शंकर पोखरेलं धयादीगु दु ।
वय्कलं आःया अवस्थाय् माओवादीयात नं अःपु मजूगुलिं सहमतिइ मवसें हे गाइ मखु उकिं पिने न्ह्याक्व हाला जूसां माओवादी सहमतिइ हे वइ धकाः नं दावी यानादिल।
थः लिक्क लाःपिं मनूतलिसे खँ ल्हासें मन्त्री पोखरेलं थ्व खँ कनादीगु जानकारी वय्कःलिसे सतीगु छगू सूत्रं बिउगु खः ।
