आः नेतातय्सं खुले जुयाः धाये माल
जेठ १४ गते धाथें संविधान वइगु खः लाकि मखु आः नेतातय्सं खुले जुयाः धाये माल। छगू हे पार्टीया छम्ह नेतां जेठ १४ गते संविधान वइ धकाः छथाय् धयाच्वंसा वहे पार्टीया मेम्ह नेतां मेथाय् हानं संविधान वइमखुत धकाः धायेगु यानाच्वनी। आः नकतिनि हे सत्तारुढ पार्टी नेकपा (एमाले) या अध्यक्ष झलनाथ खनालं छगू सञ्चार माध्यमलिसे खँ ल्हासें खुलस्त हे जुइक जेठ १४ गते संविधान वइमखुत धकाः न्ववानादीगु दु। वय्कः हे नेता भाजुं थनिं लछि न्ह्यः तिनि मेगु निगू तःधंगु पार्टीया नेतातलिसे छगू मंकाः वक्तव्यय् सही यानाः जेठ १४ गते हे संविधान वइ धकाः जनतायात आश्वस्त याकादीगु खः। लछि हे मदुनिवं वय्कलं थःगु धापू पाका हःगुलिं उगु मंकाः वक्तव्यय् सही यानादीपिं मेपिं निम्ह नेतातय्गु प्रतिक्रिया छु खः, व खः आः खुलस्त जुइक वये माल। नेतातय्सं आः गुलिस्यां संविधान वइ व गुलिस्यां वइ मखु धकाः जनतायात भ्रमया दथुइ लाका तये मजिल ।
न्हूगु संविधान च्वयेगु क्षमता थौंया नेतातय्के मदु, थुमिसं जनतायात झंगः लायेत जक निदँया म्याद तयाः संविधान च्वयेगु नाटक म्हितूगु खः धइगु खँ संविधानसभाया न्हापांगु न्हि कुन्हु हे जनतां सीकेधुंकूगु खः। अबलय्निसें जनतायात संविधान वइ वइ धकाः झंगः लाना वयाच्वंपिं नेतातय् फय्गं आः वयाः तज्यायेत्यंगु दु। पिने संविधान वइ धकाः दुने संविधान मवइबलय् सम्पन्न यायेमाःगु 'क्रियाकर्म' या तयारी याइपिं थ्व नेतातय्सं आः जनतायात प्रस्ट लिसः बीमाःगु दु। छु जुयाः संविधान मवयेत्यंगु खः, थुकिया दोषी सु खः धइगु खँ समेत किटान यानाः जनतायात लिसः बीमाः ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
