अर्ति लुमंके मफयाः मां मंत

सारासा

थौं मांया ख्वाः स्वये

मांया ख्वाः स्वयेगु झ्वलय् लाकाः छपु च्वसु च्वयेगु बिचाः यानागु तःन्हु दयेधुंकल। च्वये धकाः लुमंकागु निता स्वता खँ मध्ये छता थ्व खः - मचाल्याय्म्हबलय् निसें द्यः/ स्वर्ग/नर्क धयागु खँय् उलि पत्याः मजू। सीधुंकाः श्राद्ध यानां सीम्हं नइ धयागु खँ, सीधुंकाः सीम्ह वये यः धयागु खँ नं पत्याः मजू। सीम्ह वःगु/ सबत ताःगु धयागु नं मसिउ/मखं। गनं सः वइबलय्/छुं लाबाक्क वःगु थें च्वनीबलय् अन छु जूगु धकाः क्वथीक स्वयेगु बानी। अथे स्वयेबलय् गनं सः ताइबलय् मेगु हे सः जुयाच्वनी ।

थथे सीधुंकूम्ह वइ मखु धकाः धायेबलय् मां नं "छ कांग्रेस जुयाः आमथे धाःगु का, (धायेत्यंगु परम्परा विरोधी जुयाः धाःगु खः।) सीम्ह नं मवइ ला?" धयाच्वनी। मिइ तयाः उनाः खरानी जुइधुंकूम्ह गथे वइ धकाः हालाच्वनेगु। मामं बुके मफुत कि थथे धाइ - "आसे, जि सित कि छंत ख्याः वये। अले सीका छं ।"

थुकथं मां नापं इलय् ब्यलय् खँ ल्हाना। जिं नं धायेगु - "का सा का, छ सीधुंकाः जितः ख्याः वा ।"

मां व जिगु दथुइ जूगु सम्झौता खः थ्व। सम्झौता कथं मां सीधुंकाः जित ख्याः वयेमाःगु जुल। धाधा मधां न्हापां बौ मंत। पुलांगु छेँ जूसां चान्हय्/न्हिनय् गबलें छुं सः मवः। हानं धाधा मधां व हे छेँय् मां मंत। गबलें गनं छुं सबत मवः। छेँय् च्वंपिंसं नं छुं ताल वा खना मधाः। मां मदयाः दच्छि मदुवं तिरि व मस्त न्हू छेँय् द्यं वन। जि छम्ह छेँ त्वःते मजियाः मां सीगु छेँय् हे द्यनाच्वना। तिरिं याकःचा द्यनेबलय् सीम्ह वइ धकाः मग्याः ला धकाः न्यनी। तर जितः धाःसा ग्याः थ्यंक मजू। सीम्ह वइ धयागु खँ पत्याः हे मजू। चान्हय् दनाः क्यबय् चःबिइ वने। ग्याः धयागु नं मदु। सः वः धयागु नं मदु ।

थ्व परीक्षण जिगु मुर्खता खः कि छु खः? जिं धाये मसः।
निता खँ। मचाल्याय्म्हबलय् जा नये धुन कि नु हुहुं छक्वः पिहां वनेगु। ब्याहाः जुइधुंकाः नं गुलि तक थ्व बानी त्वःमफिउ। छेँय् छुं ज्या परे जुइबलय् छुं छगू ज्या यायेमाःसा छेँय् मदइगुलिं दुहां वयेखतं मामं थथे धाइ - "छुं छगू ज्या वाये माःसा गबलें न्ह्यःने दइ मखु। छ स्व ले जि सी त्ययेका लः छकः तक नं त्वंके खनी मखु छं ।"

मांयाके ब्लडप्रेसर, मधुमेह, न्ह्यः मवइगु थेंज्याःगु रोग दु। अथे जुयाः दँय् छकः साधारण विरामी जू। दँय् छकः डाक्टरथाय् क्यने यंकेगु। छकः छाति स्याः धयाः डाक्टर क्यने यंका। डाक्टरं ईसीजी याकाः रिपोर्ट क्यने हजि धाल। जिं सुथय् क्लिनिकय् नां च्वकाः छेँय् वया। न्हिनय् २ बजे ईसीजीया याकः वनेमाःगु। लाक्क लिहां वये धकाः अफिस वना। अफिस थ्यनी थें च्वंकाः साइकल गया वःम्ह कायं लिउनें सःतल। कायं "अजि म्हं मफुत ... " धाल।
"छाय् छु जुल?" - जिं न्यना ।

"अजि सित थें च्वं।"थुलि धयाः काय सुम्क च्वन।
धायेखतं खँ थुल। ब्लडप्रेसर, मधुमेहया ल्वगि। उकिसनं छाति स्याः थ्व दक्व हर्ट एटेकया संकेत खः। छ न्यासि वा जि साइकल गया वने धयाः कायं गया वःगु साइकल ज्वनाः जि छेँपाखे वना ।

च्वतय् ग्वःतुका तःम्ह मांया छचालं जःलाखःलात दना च्वन। नापं तिरि दु। त्वालय् वासः पसः दुम्ह कम्पाउण्डरं मांयात जाँचे यानाः स्वयाच्वन। दक्व जाँच यायेधुंकाः कम्पाउण्डरं "मदये धुंकल। अय्नं स्वये माःसा अस्पताल यंकूसां जिउ। ...जिं स्वयेबलय् यंकाच्वने म्वाःल।' धाल।
२ बजे ईसीजी याकेत नां च्वका तयागु। तर ईसीजी याके मलावं मंत ।

मां मदयाः यक्व लिपा जिगु मनय् मां नं धाइगु खँ लुमन - "... छ स्वले जि सी त्ययेका लः छकः तक नं त्वंके खनी मखु छं ।"

मां नं छकःपतिं धाइगु थ्व खँ आखिरय् मां नं धाःथें जुया वन। मां मदुखुन्हु नापं जा नयाः पिहां वनाः पाँच निसें दश मिनेटया दुने हर्ट एटेक जुल। थुबलय् त्वालय् च्वंगु पसलय् हे गफ यानाच्वनागु तिनि खः। मचाल्याय्म्हबलय् निसें जा नये धुंकाः स्वाकनं पिहां वनेगु बानी कथं अफिस वनेगु इलय् (आः तक नं) जा नयेधुंकाः पिहां वनेमाः। उबलय् नं जा नयेधुंकाः दश मिनेट लिपा जक छेँनं पिहां वंगु जूसा मां मदुगु इलय् जि छेँय् हे दइ ।

मांया दुनुगलं निसें धाइगु खँ आखिरय् जुयां हे त्वःतल।
स्वता खँ। मां नं मचाबलय् निसें अर्ति बीगु - "संगत धयागु थः स्वयाः तःधंपिनिगु यायेमाः। तःधंपिनिगु संगत याःसा तःधंगु बुद्धि वइ। चीधंपिनिगु संगत याःसा चीधंगु हे बुद्धि जुइ ।"

मांया थ्व अर्ति मां मदयेकाः लुमंसे वः। आखिर मां सी माःगु कारण नं छता चीधंपिनिगु संगत यानाः हे खः ला धकाः मतिइ वः। व गथे धाःसा मांया छाति स्याः धयाः डाक्टरथाय् क्यना हयाः। उबलय् डाक्टरं ईसीजी यानाः रिपोर्ट क्यने हजि धाल। मांया अपाय्सकं छाति स्याःगु मदु थें च्वं। नयात्वनाः सना जुया हे च्वन। थ्व झाः छम्ह साधारण मनूनाप मेगु हे ल्वय्या बारे खँ जुल। व साधारणम्ह (थन वयात 'चीधंपिनिगु संगत'या धलखय् तयागु।) मनुखं धाल - "डाक्टरथाय् क्यंवनेबलय् सलंसःया जाँच याकी। उलिमछि खर्च यानाः रिपोर्ट क्यनेबलय् छुं मजू धकाः साधारण वासः च्वयाः बिया हइ। उलिमछि खर्च यानाः जाँच याकुगु दक्व सितिं ...।"
उबलय् जिगु मनय् व चीधंम्ह (साधारणम्ह) मनुखं धाःगु खँ खः थें च्वन। हानं मां नं तच्वःगु खने मदु। लिपा छाति अप्वः हे स्यात धाःबलय् ईसीजी यायेत नां च्वकः वना। तर उबलय् लिबाय् धुंकूगु जुयाच्वन। गुकिया कारण ईसीजी यायेत बिया तःगु टाइम न्ह्यः हे मांयात हर्ट एटेक जुयाः छक्वलं मंत। थनथाय् मां नं धाः थें यदि जिं च्वय् उल्लेख यानाम्ह साधारण मनू नापमलाःगु जूसा जिं न्हापा हे (इलय्) ईसीजी याकः वनीगु जुइ। तर उबलय् व साधारणम्ह मनू नापलानाः वयागु मूर्खगु खं जितः प्रभावित यात। वहे कारणं जिं नं इलय् ईसीजी याकः मवन। थ्वहे जिगु तःधंगु गल्ति जुल।
मांया "संगत धयागु थः स्वयां तःधंपिनिगु यायेमाः। तःधंपिनिगु संगत याःसा तःधंगु बुद्धि वइ। चीधंपिनिगु संगत याःसा चीधंगु हे बुद्धि वइ।" थ्व अर्ति मां मदयेधुंकाः छकःपतिं लुमना च्वं। थज्याःगु गल्ति मेपिनि नं मजुइमा धकाः पासापिंनापं थज्याःगु खँ जुइबलय् इमित कनेगु याना ।

More Stories Like this