वाईसीएलं जिप्रका घेरे यात
घेराउ लिपा वाईसीएल इन्चार्ज त्वःतल
येँ (सन्ध्या टाइम्स)/प्रहरीं म्हिगः ज्वना यंकूम्ह वाईसीएल इन्चार्ज एवं सभासद् कुलप्रसाद केसी (सोनाम) यात त्वःतकेत थौं वाईसी एल कार्यकर्तातय्सं येँ हनुमानध्वाखाया जिल्ला प्रहरी ज्याकू घेरे यात। वाईसीएल कार्यकर्ताया घेराउ लिपा प्रहरीं सभासद् केसीयात थौं हे न्हिनय् १२ बजे त्वःतूगु दु ।
वाईसीएल कार्यकर्तातय्सं रत्नपार्क, जमल व भिंद्यःत्वालं स्वंगू थासं जुलुस पिकयाः हनुमानध्वाखा ज्याकू घेरे याःगु खः। उमिसं प्रहरी ज्याकू घेरे यासें प्रहरी प्रशासन विरुद्ध घौछि नाराबाजी नं याःगु खः। वयां लिपा प्रहरीं सभासद् केसीयात त्वःतूगु खः। घेराउ ज्याझ्वलय् माओवादी नेता पम्फा भुषालपिसं नं ब्वति काःगु खः ।
केसीयात त्वःतेधुंकाः कार्यकर्तातय्सं वय्कःयात लसकुस यानाः यंकुसें मरुया महाद्यःपार्वती दबुली छगू सभा नं याःगु खः। उगु सभाय् वय्कलं संवोधन यानादीगु खः। उगु सभा वाईसीएल नेवाः राज्य समितिया ग्वसालय् जूगु खः।
सभासद् केसीयात म्हिगः बहनी १०.३० बजे चाबहिली चेकिङ्गया झ्वलय् प्रहरीं ल्वाभः ज्वना वःगु द्वपनय् वय्कः व वय्कःया अंगरक्षक छम्हेसित ज्वंगु खः। उगु इलय् प्रहरीं वय्कःपाखें अनमिनपाखें प्रमाणित यानातःगु पेस्तोल बरामद याःगु खः। तर माओवादीं धाःसा वय्कःयाके च्वंगु उगु पेस्तोल सुरक्षाया लागिं पिने ज्वना जूसां जिउ धकाः अनमिनं हे अनुमति बियातःगु खः धकाः दावी याःगु दु ।
