पासपोर्ट भारतय् मबीगु साहसिक निर्णय

मेशिन रिडेबल पासपोर्ट भारतय् छापे यायेगु धकाः सरकारं याःगु निर्णय आकाझाकां वयाः लित काःगु तसकं पाय्छिगु पलाः जूगु दु। सरकारं यायेधुंकूगु थ्व निर्णय लित कायेमाः धकाः सरकारयात थीथी थासं दवाव वयाच्वंगु खः। संसदया लेखा समिति, विपक्षी पार्टी, सरकार दुनेया हे छुं मन्त्री व थःगु हे पार्टी दुनेया सभासद्त। थ्व फुक्क थासं वःगु दवावयात कदर यासें प्रधानमन्त्री माधव नेपालं अन्ततः भारतय् पासपोर्ट छापे याकेगु निर्णय लित कया धकाः निर्णय याना बिउगुलिं थुकियात सकस्यां च्वछाःगु दु ।

तर नेपाःमितय् मनोविज्ञान धाःसा गुलि कमजोर जुइधुंकल धइगु खँ सरकारपाखें याःगु थ्व निर्णय लिपा पिहां वःगु टिकाटिप्पणीं स्पष्ट क्यना बिल। भारतय् छापे याके धायेधुंकूगु निर्णय लित काःगु कारणं आः प्रम खनाः भारत तम्वइ व भारतं प्रमयात चीकेगु तक कुतः याइ धइगु विश्लेषण थन पिहां वयाच्वंगु दु। वास्तवय् थ्वहे इलय् नेपाःमिया सही परीक्षा यायेमाःगु खः। यदि पासपोर्ट भारतय् छापे याके मखु धाःगु कारणं हे भारतं प्रम नेपालयात सरकारं चीकेगु कुतः यात धाःसा उकियात सकस्यां छप्पँ जुयाः प्रतिकार यायेमाः। अज्याःगु इलय् माओवादी नं पार्टीगत अडानयात त्वःताः माधव नेपालया सरकारयात बचे यायेगु राष्ट्रवादी अभियानय् लगे जुइमाः। पासपोर्ट प्रकरणं हे यदि भारतं नेपालया सरकार क्वःथल व वयां लिपाया सरकारय् माओवादी फ्यतू वन धाःसा व माओवादीया राष्ट्रवादी पलाः जुइ मखु। थ्व खँयात मनन यायेमाः। सरकारया थ्व पलाः लिपा भारतं गज्याःगु नीति ज्वनी व धाःसा स्वये हे माली ।

More Stories Like this