स्वये,सम्झौता गय् जुइ?

नर्मदेश्वर प्रधान

च्वसु च्वये माली। फ्यतुइ। विषय लुइके। च्वसा न्ह्याके। अक्सर मतिइ तयागु विषय अनुरुप च्वसु क्वचाइ। तर गबलें गबलें अथे जुया बी मखु। पाइ। मतिइ छगू तये। कलम न्ह्याके। कलमं अनसं मेगु हे लँ ज्वना बी। लँ बाया बी। च्वसा मेखे जुइ। निर्णय छगू जुइ। लिच्वः मेगु हे पिहां वइ। विषयान्तर जुया बी ।

उकुन्हु अथेहे जुल। च्वसा न्ह्याके। मतिइ छगू हे तया। च्वच्वं वना। लं ट्र्याक हिली। मेमेगु हे खँ पिहां वइ। क्वःछिनागु खँ नुगलय् तुं थाइ। मतिइ दइ। पिकाये मानि। दुसुकाः छ्वयेगु खँ जुइ मखु। अवसर पी। त्वःफिउगु खँ। नुगलय् ल्यहेँ पुनाच्वंगु विषय। 'पिहां वये दुसा जिउ'। खँतसें जितः निवेदन यानाच्वनी। घ्वानाच्वनी। थौं जिं व हे खँ प्वंके ।

खँ न्ह्याके न्ह्यः उकुन्हुया खँ भचा लिसा काये। च्वसुयात च्वःप्वः थुकिं चूलाकी। चस्मा दयेके बियागु। काः वने। चस्मा पसलय् साहु दइ मखु। साहुनी जक। 'साहु पलख पिहां झायाच्वन, थथें झाइ, दिसँ।' साहुनीं इनाप याइ। जि फ्यतुइ। साहुजीया प्रतीक्षाय् ।

चस्मा पसःया पिने। क्वसं। घिरिघिरिचाय् थीथी कथंया हाकुगु गगल्स चस्मात । मस्तय्गु। मिस्तय्गु। रंगीचंगी फ्रेम। व घिरिघिरिचा। साहुजीया हे जुयाच्वन। लँय् वयाच्वंपिं। घिरिघिरिचा न्ह्यःने दी। गगल्सत स्वइ। साहुनी वनी। 'छु माल?' न्यनी। जि अनसं च्वने। साहुनी व ग्राहकतय् संवाद न्यने। व्यापारय् खँ सयेकेमाः। मतिइ तये। 'सँ मदुम्ह तालुयात ककीचा मी' छम्ह कुशल व्यापारीं। न्यनागु दु। धात्थें खः। मनूया नुगः नये फयेकेमाः। छम्ह व्यापारीं। 'छु माल थें? मेगु नं दु। भाः स्वया बी का।' शिष्टता, धैर्य कयाः साहुनीं ग्राहकलिसे खँ ल्हाइ। मचातय् हाकुगु चस्मा खनी। पुलांगु खँ लुमनी। मचाबलय्। जिमि बाःयात जिं पिरे यानागु। दुःख बियागु। हाकुगु चस्मा न्याना बिउ धकाः। न्यानां हे त्वःता। आकर्षणया कारण छु थें? उबलय्। जिं मसिउ। शायद हाकुगु चस्मा तल कि हिरो जुइ दइ ला? फूर्ति दइ ला? मचा सां जितः उबलय् गगल्सया धुन छाय् जुल? जिं धाये मफु। तर गगल्स न्याना बिउ धकाः जिमि बाःयात दुःख बियागु जितः आः नं लुमं ।

हाकुगु चस्मा। गगल्स छाय् तइगु? पसलय् साहु पियाच्वनाम्ह जि। जिं बिचाः यायां वने। मिखा स्यनी। पावरया चस्मा तये माली। गगल्स ला अनिवार्य मखु। अय्नं मनूतसें शौंख याइ। चस्मा ढल्के याना जुइ। हाकुगु चस्मा। छाय् तइगु जुइ? विश्लेषण याये। पसलय् साहु पियाच्वनाम्ह जितः। ई छ्यायेत त्वहः दइ ।

निभाः थी। पिहां वने माली। कडा निभाः पनेत हाकुगु चस्मां ज्या बी। मिखा स्याइ। हाकुगु चस्मा तये माली। थ्वं ल्वय् पुंके बी मखु। फय् वइ। धू ब्वइ। हाकुगु चस्मां मिखा सुरक्षित जुइ। हाकुगु चस्मा यक्वस्यां ज्या बिउ खनी। मतिइ वइ।
"मखु। मालाः जक मखु। फेशनया लागि नं हाकुगु चस्मा तः।" खँ लुइ। खः। धात्थें ला हाकुगु चस्मा फेशनया लागि तइ। हिरो हिरोइन जुइत। चस्मां सौन्दर्य वृद्धि याइ। आकर्षण तनी। व्यक्तित्व ढाँचाकाचां याना जुइ। बजारय् मचातय् गगल्स नं दु। न्यायेमाल। मां बौपिंत मचातसें दुःख बी। हाकुगु चस्माया प्रयोजन छु? बिचाः यायां वने। मखु हाकुगु चस्मा अपराधीतसें नं छ्यः। जासुसतसें तः। थःगु सकल त्वपुइत हाकुगु चस्मा मालीबलय् ज्या बिउ। गबलें हाकुगु चस्मा तइपिं खनाः शंका वनी। मनूया नुगः मिखां उलाच्वनी। मिखाभाय्या मनोवैज्ञानिक महत्व दइ। गुलिस्यां थःगु मनोविज्ञान पनेत नं मिखाय् हाकुगु चस्मा तइ। उकुन्हु रमेशया म्ह्याय् पित बिउगु। रमेशं हाकुगु चस्मा तयातल। छाय् थें? जिं बिचाः याना। मिखा जकं स्यात ला। जिं न्यना। मखइ च्वन। लिपा जिं थुल, ख्वबि सुचुकेत वं हाकुगु चस्मा तःगु खनी। हाकुगु चस्मा व्यथा सुचुकेत नं ज्या बिउ। जिं उबलय् थुइका। हाकुगु चस्माया प्रयोग बारे बिचाः यायां झं झं ताहाया वनी। 'मखं छु' यायेत हाकुगु चस्मां तसकं ज्या बिउ। खुयाः खुयाः स्वयेत थ्वं ग्वाहालि याः ।

हाकुगु चस्मा दुगु घिरिघिरिचाय् छम्ह मय्जु वइ। मस्तय्गु हाकुगु चस्मा छगू काइ। स्वइ। हानं तइ। उबलय् साहुनीं नं धाइ 'स्वयादिसँ, मेगु नं दु... भाः मिले याना बी...।' व मिसां हानं मेगु चस्मा काइ ।

स्वइ। पसलय् दुहां वइ। साहुनीं नं धाइ 'थ्व चस्मा बांलाः, भिं। निभालय् तयेबलय् सिचुसे च्वनी। सफा खने दइ। कयादिसँ, भाः मिले याना बी।' ग्राहक मय्जुं न्ववाइ मखु। गम्भीर जुयाच्वनी। शायद लाति खः ला? बागः लातिम्ह ला? जितः शंका जुइ। 'मचा ग्वःदँ दत?' साहुनीं नं न्यनी। न्यापतिं क्यनी। "थ्व ठीक जुइ। थ्व बांलाः, भिं, थुकिं निभाः बांलाक पनी, दृश्यत सफा खनी..." साहुनीं नं धाधां वनी। ग्राहक मय्जुं विस्तारं मिखा तिसी। पतिंचां मिखाय् सुइ। ल्हाः पुइकी...। वयागु ल्हाःभाय् खनी थुइ। जि सिमां कुतुं वं थें जुइ। वया मचा कांम्ह जुयाच्वन। उकिं हाकुगु चस्मा न्याः वःगु जुयाच्वन ।

More Stories Like this