नेवाः देय् दबूया झापा जिल्लाया तःमुँज्या क्वचाल

नेवाःतय् राष्ट्रिय संगठन नेवाः देय् दबूया झापा जिल्लाया तःमुँज्या वंगु चौलागा सप्तमि (April 5, 2010) कुन्हु क्वचाःगु दु । मू पाहाँ नेवाः देय् दबूया संरक्षक भाजु मल्ल के. सुन्दरं उलेज्या यानादीगु थुगु तःमुँज्या मेचि नगरपालिका, धुलाबारीया जेसिज भवनय् जूगु खः ।

मूपाहाँ भाजु सुन्दरं चीधंगु व शान्ति भूमि झीगु थःगु थासय् झीगु राज्यय् भाय् तजिलजि व थःगु हे बिस्कं पहःया वसतय् न्ह्याइपुकाच्वनाच्वनापिं झी नेवाःतय्त थःगु हे थासं पलायन व विस्थापित यानां भाय् तजिलजि व नखःचखःयात तहसनहस याना ज्यान बचेयायेत गुलिं मुगलानय् वन । मांबांपिंसं थाय् त्वःतलसा मस्तय्सं भाय् व तजिलजि त्वःता वनाच्वंगु खँ न्ह्यथनादिल । वहुदल वये धुंकाः नं २०६२/०६३ स गणतन्त्र वल तर गणतान्त्रिक सरकारं नं जातिय विभेदं याना नेवाःत मुक्त जुइ मफुनि धयादिसॆं जातिय समानता नाराय् जक सिमित याना उत्पिदन गथे खः अथे हे याना छुं हे ह्यूपा मवःगु खँ धयादिल । आः विभेद व असमानता न्हंकेगु धइगु आः वइगु जेष्ठ १४ गते दुने दयेकीगु धाःगु संविधानय् दक्व जातितय्त समान अधिकार बी माःगु खँय् बः बियादिल ।

अथेहे अध्यक्ष कृष्ण उदासं आः दयेकीगु संविधानय् हाकनं पुलांगु थें हे विभेदकारी व असमान संविधान गुकि थःगु जातिय पहिचान व अधिकार सुनिश्चित दइमखु अजाःगु संविधानयात झापाया नेवाःतय्सं वहिष्कार यासें छुं नं हालतय् ययेकीमखु धयादिल । नापं थःगु पहिचानयात गुगु नं हालतय् त्वःमफिकेगु नं प्रतिवद्धता प्वंकादिल ।

ज्याझ्वलय् म्वाःम्ह शहिद गोपाल श्रेष्ठ अथेहे भद्रपुरया मदुम्ह स्वयम्भू लाल श्रेष्ठ, चन्द्र बहादुर श्रेष्ठ व धुलाबारीया भक्तमान शाक्ययात मूपाहाँ भाजु मल्ल के.सुन्दरजुं हनापौ लःल्हासें हनादीगु खः ।

झापा जिल्लाया ४७ गू गाविस व ३ गू नगरपालिकाया नेवाःतय्सं थःथःगु नेवाः बाजं नापं जातिय वसःपुनां ब्वतिकाःगु थुगु मुँज्याय् थीथी झाँकी व निगू लाखे नापं शान्ति पदयात्रायासें नगरपरिक्रमा याःगु खः ।

मुँज्यां भाजु कृष्ण उदासया हे नायःसुइ १५ म्हेसिया न्हूगु कार्यसमिति दयेकूगु दु । भाजु उदासं आःया राजनैतिक परिस्थितिइ नेवाः छधि छपाँय् जुइमाःगु खँय् बः बियादिल ।

ज्याझ्वलय् नविन शाक्य पूर्वांचल न्वकू, प्रकाश खड्गी के.स. पाहाँ कथं झायादीगु खःसा थीथी राजनैतिक पार्टी व आदिवासि जनजातिया प्रतिनिधिपिंसं नेवाः एकताया प्रशंसा यानादिल ।

More Stories Like this