सर्वोच्चय् पासपोर्ट सुनुवाई

निर्णय लित कायेधुनागु जानकारी सर्वोच्चयात

येँ (सन्ध्या टाइम्स)/मेशिन रिडेबल पासपोर्ट भारतय् छापे यायेगु धकाः सरकारं न्हापा यानातःगु निर्णय लित कायेवं देय्या राजनीतिइ न्हूगु तरंग पिहां वःगु दु। एमाले संसदीय दलया बैठकं थ्व पासपोर्ट भारतय् छापे यायेगु निर्णय लित कायेमाः धकाः क्वःछीवं म्हिगः हे बहनी मन्त्रिपरिषद्या बैठक च्वनाः सरकारं पासपोर्ट भारतय् छापे यायेगु निर्णय लित काःगु खः। सरकारपाखें थ्व निर्णय यायेवं एमाले दुने प्रधानमन्त्रीं राजीनामा बीमाः धाइपिं सभासद्तय् सः चीसः जुइगु अनुमान याःगु दु ।

भारतय् पासपोर्ट छापे यायेगु निर्णय लित कयाः प्रधानमन्त्री माधव नेपालं आः पदं नं राजीनामा बीगु बिचाः याःगु खनेदु धइगु खँ नं थन पिहां वःगु दु। छाय्धाःसां भारतं अतिकं रुची बियाः थःगु देशय् छापे याकेत स्वयाच्वंगु थ्व पासपोर्ट आः भारतय् छापे याके मखु धायेवं सरकार खनाः भारत तम्वइगु व उकिया लिच्वः कथं प्रम नेपालया कुर्सी सनीगु निश्चित दु धकाः सूत्रं विश्लेषण याःगु दु ।

तर थ्व बारे प्रमया प्रेस सल्लाहकार विष्णु रिजालयात स्वापू तयाबलय् वय्कलं साहित्यिक स्वभाव दुपिं छुं पत्रकारतय्सं प्रमया राजीनामा वयेफु धकाः काल्पनिक समाचार च्वःगुलिं जक बजारय् थ्व हल्ला जूगु खः धयादिल ।

उखे म्हिगः बहनी लिबाक बैठक च्वनाः सरकारं भारतय् पासपोर्ट छापे मयाकेगु निर्णय यायेवं वयां १० मिनेट लिपा हे माओवादीं नं थौं घोषणा याना तःगु नेपाल बन्द ज्याझ्वः लित कायेगु निर्णय याःगु खः। थौं बन्दया लागिं म्हिगः माओवादीं येँय् विशाल मशाल जुलुस समेत पिकायेधुंकूगु खः। माओवादीं थ्व पासपोर्ट छापे यायेगु ज्या भारतय् बीगु निर्णय लित मकाल धाःसा थौं नेपाल बन्द यायेगु जुइ धकाः ज्याझ्वः दयेकातःगु खःसा म्हिगः हे सरकारं उगु निर्णय लित कायेवं माओवादीं थःपिनि दवावं यानाः सरकार अज्याःगु निर्णय यायेत बाध्य जूगु खः धाःगु दु ।

थुकिया लागिं थीथी थासं दवाव वःगु खःसां सरकारं धाःसा संसदया लेखा समितिं बिउगु निर्देशनयात पालना यासें भारतय् पासपोर्ट छापे यायेगु निर्णय आःयात लित कयागु खः धाःगु दु ।

मेखे मेशिन रिडेबल पासपोर्ट भारतय् छापे याकेगु ज्या गैर कानुनी जुल धासें सर्वोच्च अदालतय् लानाच्वंगु निगू अलग अलगयात रिटयात कयाः थौं सुनुवाई जुयाच्वंगु दु। सर्वोच्चं थ्व बारे अन्तिम फैसला मजूतले छुं नं प्रक्रिया न्ह्याके मते धकाः सरकारयात अन्तरिम आदेश बिया तःगु दु। थौं सर्वोच्चं पक्ष व विपक्ष निगुलिं पक्षयात सःताः थुकिया बारे सुनुवाई यायेत्यंगु दु। उखे सरकारं थौं महान्यायाधीवक्ता मार्फत सर्वोच्च अदालतयात पासपोर्ट भारतय् छापे याकेगु थःपिनि पुलांगु निर्णय लित कायेधुनागु जानकारी बीगु जूगु दु ।