एमाले सभासदपाखें प्रमया राजीनामा माग

येँय् शुरु जूगु एमाले संसदीय दलया बैठकय् प्रधानमन्त्री माधव नेपालं राजीनामा बीमाः धकाः सः तइपिं सभासद्तय् ज्याः अप्वया वःगु दु। छुं ई न्ह्यः हे च्वनेगु धकाः प्रस्तावित यानातःगु खःसां प्रधानमन्त्री माधव नेपालया विशेष इनाप कथं थ्व बैठक लिज्याःगु खः। गुगु इलय् दलया बैठक च्वनेगु धकाः तिथि क्वःछि उगु खः उगु इलय् एमाले संसदीय दल दुने प्रधानमन्त्रीं राजीनामा बीमाः धकाः सभासद्तय् दथुइ हस्ताक्षर संकलनया ज्या न्ह्यानाच्वंगु खः। उकिं प्रम नेपालं बैठक छुं न्हि लिछ्यायेत इनाप यानादिल। थ्वया दथुइ वय्कलं छु यानादिल खः मसिउ, प्रम विरुद्ध न्ह्यानाच्वंगु हस्ताक्षर संकलनया ज्या दित। हस्ताक्षर संकलनया ज्या दीवं बैठक सःतल। तर थ्व बैठकय् नं राजीनामाया माग धाःसा दिउगु मदु ।

एमालेया थःहे सभासद्तय्सं यानाच्वंगु थ्व राजीनामाया माग पार्टीया लागिं धाथें नं गम्भीर विषय खः। न्हूगु संविधान दयेकीगु सम्भावना मदुगु कारणं उकिया दोष पार्टीया छ्यनय् लाः वइ, अय् जुयाः राजीनामा बियाः पार्टीया छबी बचे या धइगु सभासद्तय् माग खः। वास्तवय् संविधान मदयेके मफुगु खँय् जक मखु सरकारं दैनिक यायेमाःगु ज्या तकं संपादन याये मफुगु कारणं नं सरकार असफल जूगु पुष्टि जुइधुंकूगु दु। आः नकतिनि भारतय् माओवादी आक्रमणय् लानाः ७६ म्ह सैनिक जवान सीवं अनया गृहमन्त्री पी. चिदम्बरमं राजीनामा बियादिल, यद्यपि वय्कःया राजीनामा बिचाराधिन जुयाच्वंगु दु। नेपालय् आः तक छम्ह मन्त्रीं अज्याःगु नैतिकता क्यंगु मदुनि। थज्याःगु अवस्थाय् प्रमया राजीनामा माग जुइगु अस्वाभाविक मखु ।

More Stories Like this