प्रमया राजीनामा काइपिं अप्वः
एमाले संसदीय दलया बैठक जारी
येँ (सन्ध्या टाइम्स)/म्हिगःनिसें शुरु जूगु एमाले संसदीय दलया बैठकय् थःगु हे पार्टीया प्रधानमन्त्री माधव नेपालं राजीनामा बीमाःगु माग याःगु दु। थ्व इलय् प्रधानमन्त्री बचे यायेगु स्वयां नं पार्टी बचे यायेगु मू खँ खः धासें सभासद्तय्सं यदि संविधान इलय् मवल धाःसा पार्टीयात तःधंगु धक्का लाइगु तर्क न्ह्यःने तःगु खः ।
उकिया प्रतिकार यासें प्रम नेपाल पक्षया सभासद्तय्सं संविधान च्वयेगु ज्या ला न्हापा प्रचण्डं नं याये मफुगु खःनि, तर अबलय् प्रचण्डया विरोध यायेम्वाः, थौं माधव नेपालया जक छाय् विरोध यायेमाःगु धकाः न्ह्यसः तःगु खः ।
उकियात नं लिसः बिसें प्रम विरोधी सभासद्तय्सं अबलय् संविधान जारी यायेगु ई न्ह्यःने मथ्यंनिगुलिं विरोध यायेमाःगु स्थिति मवल, तर आः ई न्ह्यःने थ्यंकः वःगुलिं दोष फुक्क एमालेया कपालय् लाइगु जुयाः विरोध यायेमाःगु खः धाःगु खः ।
म्हिगः नेपालया पक्षय् सीता पौडेल, कृष्णप्रसाद सापकोटा, थममाया थापा, दीपक कार्की व नजिर मियाँ न्ववाःगु खः। अथे हे प्रमया विरोधय् युवराज कार्की, डा. विजय पौडेल (मोदनाथ प्रश्रितया काय), रामनाथ ढकाल, गोपाल ठाकुर, सरला यादव, ल्हार्केर लामा, यमलाल कँडेल, रविन्द्र अधिकारी, प्रद्युम्न चौहान व पुलांम्ह गृह राज्यमन्त्री रिजवान अन्सारीं न्ववानादीगु खः। दलया बैठक थौं नं जारी जुयाच्वंगु दु ।
केपी ओलीया छगू शर्त
प्रधानमन्त्री माधव नेपालयात चीकेगु सवालय् वय्कःया कट्टर समर्थक केपी ओली नं सहमत जुयादीगु खँ धाःगु दु। तर उकिया लागिं ओलीं छगू शर्त न्ह्यःने तःगु दु। केपीया शर्त खः, नेपालयात चीकेधुंकाः वय्कःया थासय् पार्टी अध्यक्ष झलनाथ खनालयात प्रधानमन्त्री दयेकेगु, अले पार्टी सञ्चालनयात जिम्मा थःत बीगु। यदि अध्यक्ष झलनाथ खनाल प्रधानमन्त्री जुल धाःसा पार्टी सञ्चालन यायेगु जिम्मा वरिष्ठ उपाध्यक्ष वामदेव गौतमयात वनी। छुं जुयाः गौतम नं सरकारय् वन धाःसा पार्टीया जिम्मा वयां क्वय्या उपाध्यक्ष अशोक राईयात वनी। उकिं ओलीं पार्टी सञ्चालनया जिम्मा थःत बीमाः धकाः शर्त तःगु खः ।
