रामदेवया राजनीतिक यात्रा

डी.आर. खड्गी

भारतया हरियाणा प्रदेशय् जन्म जूम्ह रामदेवया कर्म क्षेत्र उत्तराञ्चलया हरिद्वार खःसां वय्कःया योग साधनाया प्रचार भारत जक मखु विश्वय् हे जुयाच्वंगु दु। विश्वया जनतायात निरोगी यासें सकारात्मक भावना विकास यायेगु सन्देश ज्वनाः बाबा रामदेवया कुतः न्ह्यानाच्वंगु दु। यक्व देशय् वनाः योग ध्यान केन्द्र शिविर सञ्चालन यासें योग शिष्य व समर्थकत तयार यानाच्वंगु दु। भारतय् जक लखौं शिष्य व समर्थक तयार यानाः रामदेवया लागिं ज्यान पाइपिं तकं आपालं दयेकेधुंकूगु दु। येँ देशय् वंगु चैत्र १४ गतेनिसें १९ गते तक तिंख्यलय् योग शिविर संचालन यानाः आपालं मनूतय् नुगः त्याकेत वय्कः सफल जुयादीगु दु। थुगुसी तिंख्यःया शिविरय् थगुने स्वयां थिकेगु प्रवेश शुल्क कयाः नं करोडौं ध्यबा मुंकेधुनागु खँ ग्वसाः खलकं धाःगु दु। बाबा रामदेवं योग प्रशिक्षणया झ्वलय् भाषण बिसें थथे नं धयादिल, थ्व प्रवेश शुल्कपाखें गुलि नं ध्यबा उठे जूगु खः थ्व दां नेपालय् हे खर्च यायेगु जुइ। रामदेव नापं नेपाः वःपिं आयुर्वेदिक डाक्टरतय्सं नं वासः मियाः करोडौं करोड तकाया व्यापार यायेत सफल जूगु दु। बाबा रामदेवं ला म्हुतुं हे बचं बीधुंकूगु दु कि गुलि नं ध्यबा थन उठे जुइ व ध्यबा थनया हे जनतायात रोजगारी सिर्जना जुइ कथं लगानी यायेगु जुइ। रामदेवया सहयोगीतय्सं नं थथे धाःगु दु कि उमित माःगु ६० प्रतिशत जडिबूटी नेपालं हे वयाच्वंगु दु। नेपाःया जडिबूटी तसकं बां नं लाः। अय् जुयाः थन हे भचा तकूगु बुँ न्यानाः जडिबूटीया खेती यायेगु योजना वय्कःपिंसं दयेकातःगु दु। हिमाली व पहाडी भेगया किसानत जग्गा मीत तयार नं जुयाच्वंगु दु। यदि किसानतय्सं अप्वः ध्यबा कयाः मियाः उगु ध्यबायात सही थासय् प्रयोत यात धाःसा उकियात ठीक जू हे काये माली। बरु किसानतय्सं उगु ध्यबा सही थासय् प्रयोग याये मखन धाःसा लिपा वनाः पश्चाताप जक याये माली। छुं दँ न्ह्यः स्वनिगःया नेवाःतय्सं पिनेयापिंसं यक्व ध्यबा बिल धकाः थःपिनि बुँ धमाधम मीगु यात। थौं अथे बुँ मिउपिं फुक्क उखे लाः थुखे लाः मदयेवं सितिं बुँ मी लात धकाः पश्चाताप यानाच्वंगु दु। हिमाली व पहाडी भेगया किसानतय्सं नं स्वनिगःया नेवाःतय्सं थें लिपा वयाः पश्चाताप यायेगु बाहेक मेगु छुं हे विकल्प दइ मखु ।

रामदेव व वया सहयोगीतय्सं थन उद्योग खोले यानाः थनया जनताया रोजगारी बियाः आर्थिक स्थिति थकायेगु धकाः फुर्ति याःसां खाली स्वांग जक जुइ। झीसं खनाच्वनागु दु भारतीय मूलया मारवाडीतय्गु गुलि नं उद्योग दु, व थासय् नेपालीतय्त क्वय्या स्तरया ज्या बियाः भारतीयतय्त महत्वपूर्ण पदय् तइ मखु धइगु ग्यारेन्टी दु ला? रामदेवं नेपाली जनतायात निरोगी व सकारात्मक भावया विकास यायेगु धकाः नं भाषण बीगु यात। यदि धाथें स्वस्थ व निरोगी यायेगु खःसा भारतं वयाच्वंगु मिसावट खाद्य पदार्थयात नेपाः छ्वया हयेगु बन्द याकेगुपाखे कुतः याये माल। अथे हे भारतया नेतातय्सं थन वयाः जनतायात ध्वं लायेगु नं बन्द याकेगु कुतः याये माल ।

छगू हिन्दी उखान दु - एक तीर से दो शिकार। रामदेवया भ्रमणं नं थुकियात हे चरितार्थ यायेत स्वयाच्वंगु खनेदु। छगू ला नेपाली जनताया मन त्याकाः करोडौं तका चन्दा कायेत सफल जुल। वहे ध्यबां आः नेपाःया जग्गा जमिन भारतीयतय् नामय् न्याना काइ। मेगु खँ, नेपाःया जनतायात चीन विरुद्ध घृणा याकेगु कुतः नं यात। भारतं न्हापा न्हापा दिल्लीया दूत नेपाः छ्वयाः थःगु स्वार्थ पूर्ति याइगु खः। निक्वःगु सफल जनआन्दोलन धुंकाः नेपाःया फुक्कं नेतातय्त ल्हातय् तयाः प्याखं हुइकाः भारतं आर्थिक व राजनीतिक फाइदा कयाच्वंगु ज्यायात जनतां मययेकूगु कारणं उकिया पलेसा भारतं न्हूगु नीति कथं रामदेवयात उपयोग याःगु खः धकाः धाइपिं नं मदुगु मखु। रामदेवं योग प्रशिक्षण बीगु झ्वलय् राजनीतिक भाषण नं बीगु यानाच्वनी। अज्याःगु राजनीतिक भाषणय् चीनयात हाँक बीगु ज्या नं यात। चीनं सीमा खुल्ला यानाः बिना राकेतोक नेपाली जनतायात चीन वनेगु छुट बी फु ला धाल ?

भारतं न्यय्द्वः नेपाःमितय्त रोजगारी बियाच्वंगु दु, चीनं नं रोजगारी बीफु ला धकाः न्ह्यसः नं तल। यदि चीनं खुल्ला सिमाना व रोजगारी मबिल धाःसा थुकी चीनया स्वार्थ दु धकाः नं धाल। साधारण मनूतय् दिमागं रामदेवया थ्व धापूयात सत्य तायेका च्वनीगु स्वाभाविक खः। छाय्धाःसां भारतं सीमा चायेका तःगु दु। रोजगारी नं बियातःगु दु। चीनं नं भारतं थें छाय् सीमा खुल्ला मयात धकाः रामदेवं न्ह्यसः तः थें नेपाली जनतां नं न्ह्यसः तयेफु। साधारण जनतां रामदेवया राजनीतिक भाषण ठीक वा बेठीक छु खः धकाः बिचाः यानाच्वनी मखु। रामदेवया भाषण भारतया हे नीति कथं चीन विरुद्ध आक्रमण याकूगु खः धकाः नं कुटनीतिक ख्यलय् चर्चा दु। चीनं नं सीमा खुल्ला यायेमाःगु व नेपाःमितय्त रोजगारी बीमाः धइगु रामदेवया बिचाः खने दत। यदि चीनं नं नेपाःया सीमा खुल्ला यात धाःसा उकिया लबः भारतया विहारी जनतां कायेगु याइ। बिहारी जनतायात चीनय् घुसपैठ याकाः गथे नेपाःया तराई लागाय् हतियारधारी पुचःतपाखें आतंक सिर्जना याका तःगु खः चीनय् नं अज्याःगु हे ज्या याका तयेगु भारतया बिचाः जुइफु। चीनया तिब्बतय् अज्याःगु आतंकपूर्ण वातावरण सिर्जना यायेगु भारत व अमेरिकाया सोच खः। रोजगारीया खँ ल्हायेगु खःसां नं भारतं नेपाःमितय्त चौकिदार व सैनिक पुलिस बाहेक गनं ज्या बियातःगु मदु। नेपाःया चौकिदारतय्सं भारतया आन्तरिक सुरक्षाय् तःधंगु योगदान बियाच्वंगु दुसा सैनिक जवानतय्सं भारतया हे सुरक्षा याना तःगु दु। झीसं खनाच्वना, भारताय सीमा सुरक्षा बलं नेपालय् आतंकित यानाः तराई लागाया जनतायात सास्ति व दुःख बियाच्वंगु दु। यदि भारत सरकारं
रामदेवयात गोप्य मन्त्र बियाः नेपाः छ्वया हःगु मखुसा नेपाःया फुक्क नेतात रामदेवया लिउलिउ ब्वाँय् जुइ नं मखु जुइ। अले रामदेवयात नेपालय् भीआईपी सुरक्षा नं बी मखु जुइ ।

More Stories Like this