संसदया सिक्किमीकरण शुरु जूगु संकेत

नेपाःया सरकारयात भ्रष्ट यायेधुंकाः आः संसदयात नं भ्रष्ट यायेगु कुतः शुरु जूगु दु। उकिया न्हापांगु पलाः मेशिन रिडेबल पासपोर्ट छपाई प्रकरणंनिसें न्ह्याकूगु दु। दकलय् न्हापां ला संसदया सार्वजनिक लेखा समितिं उगु पासपोर्ट टेण्डर कल मयासे भारत वा छुं नं देशय् छापे याके मतेनि धकाः सरकारयात निर्देशन बिउगु खःसां सरकारं उकियात वास्ता भारतय् छापे याकेगु निर्णय यात। थुकिं संसदया पूरा हे अवहेलना जूगु दु। उखे सरकारयात संसदया गुगु समितिं अज्याःगु निर्देशन बिउगु खः आः वयाः उगु समिति दुने हे थुकिया बारे विवाद पिहां वःगु दु। लेखा समितिया मधेशवादी सभासद्तय्सं सरकारं भारतय् छापे याकेगु धकाः निर्णय हे यायेधुंकूगु दुसा थुकी अप्वः कचवं पिकाये जी मखु धकाः फरक मत तया हःगु दु। थ्व पासपोर्ट छापे यायेगु ज्याय् भारतं नेपाःया सरकार जक मखु संसदीय समितियात समेत प्रभावित यायेधुंकूगु संकेत थुकिं बिउगु दु। उकुन्हु तक सरकार जक भारतया कुसा क्वय् लानाच्वंगुली आः संसदया समितित तकं भारतया कुसा क्वय् लायेगु शुरु जूगु थ्व ज्यां नेपाः नं आः बुलुहुँ सिक्किमीकरणया दिशापाखे वनेगु शुरु जूगु संकेत वःगु दु। सिक्किमय् नं थुकथं हे संसद तकं भारतया प्रभावय् लानाः अन्ततः संसदं हे सिक्किमयात भारतय् विलय यायेगु निर्णय याःगु खः। एमआरपी भारतय् छापे यायेगु थ्व प्रकरणय् एमआरपी स्वयम्या संवेदनशीलता सिबें नं संसदयात भारतं थःगु प्रभाव क्षेत्र दुने लाका हःगु अझ ग्यानापुगु विषय खः। राजनीतिक पार्टी व देय्या सकलें राष्ट्रवादी शक्तितय्सं थुकियात गम्भीर रुपं कायेमाःगु खनेदु ।

More Stories Like this