ख्वपय् बिस्काः नापं अप्पां कयेकेगु नं शुरु

ख्वपया दकलय् तःजिगु बिस्काः जात्रा म्हिगः चैत २८ गते सनिवाःनिसें शुरु जुल। ख्वपया टौमढी त्वालय् दयेकातःगु भैलद्यःयात थःने क्वःने सालाः थुगु जात्रा शुरु जूगु खः। भैलः खतय् भैलःद्यः स्थापना यानाः न्ह्याइगु बिस्काः जात्राया थुगु न्हापांगु दिंयात द्यः कुहां बिज्याइगु धाइ। म्हिगः द्यः कुहां बिज्याःगु लसताय् भैलःखःयात थःने क्वःने सालेगु ज्या जूगु खः। थथे भैलःखः सालेगु झ्वलय् टौमढी त्वालय् हे छम्ह हःपाः बियाच्वंम्ह ल्याय्म्ह बैतासिं कुतुं वःगु खः। वयां लिपा हे अन बेतासिं त्वःधूगु खः। अथे त्वःधूगु बेतासिँ थःने क्वःने सालेगु झ्वलय् क्याफे न्यातपौ तक यंकेगु ज्या जूसां म्हिगः सनिलय् उगु खःयात थःनेपाखे हःगु खः। थथे थःने भैलः खः हयेगु झ्वलय् सुखुध्वाखाया भुरुभुरु हितिचाय् थ्यंकाः उगु त्वःधूगु बैतासिँ व बेताद्यः भैलः खःपाखें अलग्ग हे जूवंगु खः। थथे अत्यन्त दुर्लभ घटना जूवनेवं प्रहरी प्रशासनं भैलःखःयात छझाः नियन्त्रणय् काःगु खः। तर प्रहरी वनेवं भैलःखःयात थःनेपाखे दत्तात्रय् तक थ्यंकेहःगु खः ।

भैलःखः सालेगु झ्वलय् अथे सुकुध्वाखाय् बैतासिं त्वःधुलेवं स्वम्ह प्यम्ह मनू सामान्य घाःपाः जूगु खः। तर वयां लिपा नं अन थीथी कथं छिटपुट ल्वापु धाःसा जारी हे जुयाच्वन। दकलय् मनूत बिसिउँ वने मायेक ल्वापु धाःसा भैलः खः दत्तात्रयं इनाचोपाखे लित यंके धुंकाः जुल। उगु इलय् भैलखः छखा छेँय् न्याः वनेवं मनूत आँटे चायाच्वंगु इलय् अज्ञात थासं अप्पां कयेकेगु शुरु जूगु खः। तर प्रहरीं उकियात नियन्त्रणय् कयाः शान्त याःगु खः। आपालं सशस्त्र प्रहरीया उप स्थितिइ अथे ल्वापु नियन्त्रण जूवंगु खः। बहनी लिबाक तकं उगु भैलःखः सालाः लिपा गाःहितिइ क्वफायेमाःगु (थाते लाकेमाःगु) भैलः खः क्वःनेपाखे सालाः यंकाः बंशगोपालय् थ्यंकातःगु दु ।

बिस्काः जात्राया झ्वलय् कंस सुथय् तालाक्व त्वालय् ल्हाः मदुम्ह यःसिं थनी। वयां लिपा भैलः खः व नकिंजुया खःचा ल्वाकीगु चलन दु। थथे यायेगुयात ज्वःचिंकेगु धकाः नं धाइ। उकुन्हु हे बहनी यःसिं ख्यलय् भैलःखः व नकिंजु खः यंकाः मूल यःसिं थनी। थथे मू यःसिं थनेधुंकाः बहनी बाराही अजिमाया तिंप्वाः जात्रा यानाः द्यःछें द्यःयात खतय् तयाः खुसि छिकाः पीठ द्यइके तक तये यंकीगु चलन दु। बैशाख १ गते सुथंनिसें भैलः खतय् च्वंम्ह बेताद्यःयात मिखुंचा स्यानाः पूजा यायेगु नापं यःसिं गाः व जःखः द्यइके वनेगु शुरु जुइ। न्हिछिं पूजा जुइधुंकाः बहनीपाखे उगु यःसिं क्वःथली। मूल जात्रा क्वचाःसां बैशाख २ गते कुन्हु ब्रम्हायणी जात्रा, बैशाख ३ गते महालक्ष्मी महाकाली जात्रा व बैशाख ४ गते द्यः सगं बीगु नापं छुमा गणेद्यःया जात्रा न्ह्याइ। स्थानीय जात्राय् नं उलि हे मनूत सहभागी जुइगु जुयाः च्याचाः गुन्हु तक न्ह्याइगु थुगु बिस्काः जात्रायात ख्वपया दकलय् तःधंगु जात्रा कथं कयातःगु दु। आः तक थुगु जात्राया झ्वलय् छुं मानवीय क्षति धाःसा जूगु मदुनि। प्रशासनं माःगु प्रवन्ध यानातयागु जानकारी बिउगु दु ।

More Stories Like this