खनेदुगु पेन्टी

स्वनिगःया नकतिनियापिं ल्यासतेय् थौंकन्हय् छगू मेगु नं फेशन वःगु दु - गय् यानाः ज्यू थम्हं दुने न्ह्यानातयाःगु अन्तरवस्त्र अय् धइगु पेन्टी नापं पिनें हे खने दयके न्ह्यायेगु । खतुं जमाना पारदर्शिताया खः । सुनां गज्याःगु वसः पुनावल धकाः जक मखु सुनां गज्याःगु 'दुनेया वसः' पुनावल धकाः सीकेगु व सीकेबीगु नं थौंया चलन खः । थम्हं न्ह्यानातयाःगु पाइन्ट स्वयां १ इञ्च ति पिहाँ वयेक पेन्टी न्ह्यायेगु व कमिज वा टिशर्ट चाहिं ३ इञ्च ति थहां वंक फीगु थौंया युगानुकुल फशे न जुइ धुंकल । शायद थ्वहे कारणं जुइमाः थौंकन्हय्या नवयौवना मय्जुपिं पाइन्ट सिबें नं पेन्टीपाखे अप्वः 'च्वाइसी' जुयाच्वनी । छाय् कि उमित स्वइपिं मिजंतय् मिखा नं आः पाइन्टं दुहाँ वनाः पेन्टीपाखे केन्द्रित जुइ धुंकूगु दु ।

पाइन्ट स्वयां पेन्टी खने दयेक न्ह्याइपिं मय्जुपिंत पुलांपिं मनूतय्सं नकचरी नं धायेफु । धायेब्यु । छाय् कि अन्तरवस्त्र खने दयेक वसः पुना वइपिं मय्जुपिं नकचरी मखु । व ला वास्तवय् थःत नकचरी धाइगु यक्व सम्भावना दु उकिं थः नकचरी मखु धकाः क्यनेगु लागिं हे अथे यानाः फिनावःगु खः । पिने पाइन्ट जक न्ह्यानाः दुने छुं मन्ह्यसे वल धाःसा व नकचरी जुइफु । सुनां थःगु पेन्टी नापं खने दयेक वसः फिनावइ वयाःगु बारे कम से कम थुलि ला निश्चित जुइफु कि वं पेन्टी ला न्ह्यानावःगु दु । सुया पेन्टी खने दइमखु वयाःगु बारे छिं गय् यानाः अनुमान यायेगु ? वं पेन्टी न्ह्यानावःगु दु ला मदु ला दु कि मदु धकाः न्यनेगु नं खँ जुइ मखुत । सुनां न्ह्यानातःगु छिं पिनंनिसें हे खंकेफु व गय् यानाः नकचरी जुइ ? नकचरी ला न्ह्यानामतःपिं जकं जुइ का ! उकिं नकचरी खने दयेक न्ह्यानातःपिंत मखु खने मदयेक न्ह्यानातःपिंत धयादिसँ । गुगु फेशनं झी म्ह्याय्मस्त नकचरी मखु धकाः पिनंनिसें हे परिचय बी उकियात कयाः छाय् आपत्ति ?

More Stories Like this