संविधान मवइगु रिपोर्ट
माःगु तयारी यायेत सुझाव
येँ (सन्ध्या टाइम्स)/जेठ १४ गते संविधान जारी याये मफइगु कारणं उकिया लागिं लछि न्ह्यः हे जारी याये मफइगु खँ घोषणा यायेत सरकारयात छुं कानूनविद्तय्सं सुझाव बिउगु दु ।
जेठ १४ गते संविधान जारी याये फइ लाकि मफइ धइगु बारे एमाले समर्थक कानून व्यवसायीत हरिकृष्ण कार्की, हरि उप्रेती व टीकाराम भट्टराई स्वम्हेस्यां थीथी थासय् न्यनेकने यानाः अध्ययन यानाच्वंगु खः। उमिसं जेठ १४ य् संविधान जारी याये फइ मखु धइगु हे निष्कर्ष पिकाःगु दु। थ्वहे निष्कर्ष ज्वनाः उपिं स्वम्हेस्यां वालुवाटार वनाः प्रम नेपालयात ब्रिफिङ्ग यायेधुंकूगु दु। उकिं जेठ १४ य् संविधान जारी याये मफइगु खँया घोषणा लछि न्ह्यः हे यायेत नं उमिसं सुझाव बिउगु दु। उकिं वैशाख १४ गते थुकिया घोषणा यायेगु लागिं आवंनिसें हे कानुनी व राजनीतिक वातावरण तयार यायेत नं उमिसं प्रमयात सुझाव बिउगु खँ सूत्रं धाःगु दु ।
लिसें प्रमयात संविधानय् माःगु संशोधन यानाः संविधानसभाया म्याद मेगु खुला थपे यायेत नं सुझाव बिउगु खः। सूत्रं धाः कथं प्रमयात वःगु थ्व रिपोर्ट माःगु च्यानलपाखें मेमेगु पार्टीयात नं थ्यंकेधुंकूगु दु ।
