'सगरमाथा' मखु 'चोमोलोङ्मा' खः

विश्वया दकलय् तजाःगु च्वापुगुँ सगरमाथाया उचाईयात कयाः थुगुसी हानं छक्वः विवाद पिहां वःगु दु। खास यानाः नेपाःलिसे सीमा वार्ता याः वःपिं चिनियाँ पदाधिकारीतय्सं सगरमाथाया उचाई धकाः थौंकन्हय् धायेगु यानाच्वंगु ८८४८ मिटरयात घटे यानाः ८८४४.४३ मिटर जक धायेमाः धकाः प्रस्ताव तयेवं नेपाः समक्ष थ्व समस्या पिहां वःगु खः ।

चीनं सगरमाथाया उचाई घटे यायेमाःगु बारे छगू हे जक कारण बिउगु दु, सगरमाथाया च्वकाय् दुगु च्वापुयात ल्याः तये मजिउ। उकिं उकियात घटे यायेबलय् थुकिया उचाई ८८४८ मिटर थ्यंक जुइ मखु धइगु उमिगु तर्क खः। नापं चीनं सगरमाथाया उचाई बारे न्हापांनिसें धायेगु याना वयाच्वंगु थ्व ल्याःयात थःपिंसं हे संशोधन यानाः थःपिनि सम्पूर्ण पाठ्यसफुली तकं च्वयेधुंकूगु जुयाच्वन ।

तर मात्र थुलिया लिधंसाय् सगरमाथाया उचाई बारे न्हापांनिसें धायेगु याना वयाच्वंगु थ्व ल्याः संशोधन यायेमाःगु आवश्यकता धाःसा मदु। सगरमाथा गइपिं आरोहीतय्सं च्वापु तकं गइगु खः। उमिसं च्वापु हटे यानाः गइगु मखु। अले थ्व उचाई छाय् निगू जुल धइगु नं स्पष्ट कारण दु। निगुलिं उचाई पाय्छि खः। उकिं प्रचार यायेबलय् कारण सहित निगुलिं उचाई पित बिल धाःसां छुं मपाः।
गन तक सगरमाथाया नां निगू जुयाच्वंगु खँ दु, थ्व च्वापुगुँयात 'सगरमाथा' अथवा 'माउण्ट एभरेष्ट' धायेगु सिबें उगु लागाया स्थानीय जनतां छु धाइगु खः वहे छगू जक नां बीगु पाय्छि जुइ। उमिसं थ्व च्वापुगुँयात 'चोमोलोङ्मा' धाइगु खः। थुकिया नां थ्वहे जुइमाः ।

More Stories Like this