का सा मोहम्मद भाइ !

जःथि बरे

का मोहम्मद भाइ जितः अप्वः टेन्सन बियाच्वने मते, बरु टेन्सन जुयाच्वंबलय् त्वाकराक्क राजीनामा बियाछ्व। खय्त ला छ प्रत्यक्ष निर्वाचनय् त्याका वःम्ह खः। जिपिं फुक्कसिनं माने यायेमाःगु खः। तर छु याये, छंत माने यानाच्वंत्तले जिपिं चातुवाइ। व नं ला बिचाः याये माल नि? अय्नं छ चुनावय् बूपिनि पुचलय् वल छु याये? चुनाव त्याका वयेगु तःधंगु बहादुरी मखु मोहम्मद भाइ, गय् यानाः राजनीति म्हितेगु धइगु जकं तःधंगु खँ। राजनीति यायेबलय् खःगुं मखुगुं खँ ल्हाये सयेकेमाः, त्यःगुं मत्यःगुं याये सयेकेमाः। छं धाःथें भिमचित राजीनामा बिउ धका धाःसा सरकार ला झोलुंगे पुल सं थें वाग्लावाग्ला सनी का। खेल हे थूगु मखुनि छं। मोहम्मद भाई, सुयागु गुट बल्लाइ, वयात छुं नं यायेगु खँ जुइ मखु। उखुन्हु फोरम लोकतान्त्रिकया राज्य मन्त्री करिमा बेगमं सिडियोयात मुइकल। खास ला वयात कारवाही मयासे मगाःगु नि मखु ला? तर छु याये, उमिगु पकड बल्लाः। कारवाही ला छु, उकियात कयाः न जक वाःसां सरकार सनी। उकिं आवंलि छं नं पावरफुल नेतातय्त ल्हातय् कयाः पकड बल्लाका ति ।

आः थ्व भिमचिगु गुलि पावर दु सिउला? जितः ला ख्याइम्ह व। जिं छुं न्ववाये न्ह्यः वयाके न्यनाः जक न्ववायेमाः। छु यायेगु मोहम्मद भाइ, जितः नं साप मछिं। सुयातं छुं धाल कि ला जिगु प्रधानमन्त्री चैत का। बल्ल तल्ल प्रधानमन्त्री जुइ खंगु, भचा ला होस यानाः जुइ मालनि। लिपा थज्याःगु अवसर वइ ला मवाइ ला। अवसर बिउम्ह गिरिजाबाबु नं वने हे धुंकल। जि निथासं बूसां जनताया मयःसां राजनीति म्हितेगुली कम मजू। गिरिजा बाबुया शिष्य खः जि नं, सुयात छु यायेमाः छु धायेमाः धकाः बांलाक सिउ। अथे जुयाः ला जितः हे सभासद् दयेकूम्ह प्रचण्डयात हे घोक्रेथ्यांक याये फुगु नि। आः स्व, झीपिं थ्व देशय् छुं याये धकाः वयापिं ला मखु नि। खः ला? झी ला थःगु स्वार्थ पूवंकेगु, सरकार न्ह्याथे यानाः नं थातं लाका तयेगु, थः मनूतय्त उखेंथुखें भर्ना यायेगु अले मोज मस्ति यायेत वयापिं मखु ला? छु थःगु हे पार्टीया मन्त्रीयात अथे लाक्वपाक्व धयां जी ला ?

देश व जनतायात यःयःगु या छुं हे जुइ मखु। छंत जनतां मयः धकाः राजीनामा फ्वंसा थ्व सरकार व पार्टीया धापू मखु वयागु व्यक्तिगत धारणा खः धकाः जिमिसं बचाऊ याना हे बी। आः उलिमछि मन्त्रीतय्सं म्वाः मदुगु धयाच्वन ग्व थौं तक छम्ह मन्त्रीयात छंत थें का थौं हे राजीनामा बिउ धायेम्वाः। झी प्रधानमन्त्री मन्त्री धाइपिं देशया मखु नि मोहम्मद भाइ, झीपिं ला पार्टीया जुइ का। पार्टीं छु धाल झीसं वहे ज्या यायेमाः। चाहे व बांलाःगु जुइमा बांमलाःगु जुइमा। उकिया विरोध यात कि छ थें तुं मन्त्री पद स्वाहा जुइ का। आः रक्षामन्त्री विद्याया हे खँ ल्हा ले, वं जिगु खँ न्यंगु हे मखु। खालि वहे ओलीं छु धाल वहे जक न्यनी। छुं नं ज्या जुइत्यंसां झन स्यंका जक बीगु। सेना समायोजन जुइ हे फइ मखु धकाः गुलि बबाल याना बिल। आखिरय् व नं ला चुनावय् बूम्ह खःनि। वं थौं तक राजीनामा बीमाःगु दुला? छु याये वयागु पकड बल्लाः। अथे जुयाः वयात थीगु नं चान्स हे मंत। हाकनं व थः पार्टी व मन्त्रीतय्गु बारे म्वाः मदुगु न्ववानाच्वंगु नं मदु। अथे जुयाः वय्कः मय्जुयात जिं गथे यानाः राजीनामा बिउ धायेगु? मेमेगु पार्टीं ला वयात राजीनामा बीकि धकाः खुब दवाव बियाच्वंगु दु। जिमिसं हे व सरकारया मखु वय्कःया ब्यक्तिगत बिचाः खः धकाः बचाउ याना बिया। थज्याःगु खँ ल्हायेगुसा गुलि दनि गुलि दनि का मोहम्मद भाइ ।

आः न्ह्यागुसां म्वाःल। छं नं छुं मखुसां च्याला ति ला राज्यमन्त्री न हे नल। व इलय् छं नं दुई चार करोड ति ला झ्वाम यात हे जुइ। सरकारय् मन्त्रीया होडबाजी हे ध्यबा कमे यायेत जुइगु ला खः नि। आः न्ह्याम्हेस्यां न्ह्याक्व हे कमे या मतलब मदु। तैं चुप मैं चुप जुया च्वँ। का, मोहम्मद भाई आवंलि मेगु न्ह्यागु नवाःसां पार्टी व नेताया बारे छता न्ववाना जुइ मते। नेता जक जुयां मगाः। पावरफूल नेता जुइ सयेकि। बल्लाःगु व धिसिलाःगु उपगुट छगू जूसां दयेकि। थ्वहे जिगु भिन्तुना का मोहम्मद भाइ ।

More Stories Like this