माओवादीं नं न्हू भर्ती याइगु

सरकारी उजं पालना याये : पासाङ

सरकारं बियातःगु आदेशया पालना मयासे नेपाली सेनां थःपिसं यानाच्वंगु भर्ना प्रक्रिया पूवंकूगु दु । भर्ना काःपिं न्हूपिं सैनिकतय्त आः याकनं हे तालिम नं शुरु यायेत्यंगु दु । उखे नेपाली सेनाया भर्ना प्रक्रिया पूवंकूगुलिं आः माओवादी सेनां नं थः दुने न्हूगु भर्ना शुरु यायेगु लागिं सरकारयाके अनुमति फ्वनेगु तयारी यानाच्वंगु खँ सीदुगु दु ।

सरकारया आदेशयात वास्ता मयासे सेनां भर्ना प्रक्रिया पूवंकूगु खँयात माओवादी जनसेनाया कमाण्डर नन्दकिशोर पुन -पासाङं) अतिकं गम्भीर खँ खः धयादीगु दु । सेनां सरकारया आदेश पालना मयाःगु खँयात मेमेगु पार्टीसं नं गम्भीरतापर्ूवक कयाः थ्व समस्यायात गय् यानाः समाधान यायेगु धइगु विषयय् सहलह ब्याकेमाःगु बिचाः वय्कलं प्वंकादीगु दु ।

नेपाली सेनाया ल्याः जनयुद्ध शुरु जुइ न्ह्यः ४५ हजार जक दुगुली जनयुद्ध शुरु जुइधुंकाः तिनि उकियात बढे यानाः ९० हजार थ्यंकूगु खँ कँसें पासाङं थ्व सेनाया ल्याः आः हानं ९० हजार हे थ्यंका तयेमाःगुया कारण छु खः धकाः नं न्ह्यसः तयादीगु दु । जनयुद्ध क्वचायेधुंकाः नं सेनां थःगु ल्याः वृद्धि यानाच्वंगु तसकं रहस्यमय खँ खः धासें थुकिया बारे सकस्यां बिचाः यायेमाःगु खँ नं वय्कलं कनादिल ।

नेपाली सेनां थःपिनि भर्ना प्रक्रिया पूवंकूगुलिं आः जनमुक्ति सेनां नं न्हूगु भर्ना कायेगु बारे बिचाः यानाच्वनागु खँ वय्कलं कनादिल । आः थःपिं सरकारया मातहत च्वनेधुनागु जूगुलिं न्हूगु भर्तीया लागिं सरकारयाके अनुमति कायेगु लागिं प्रक्रिया शुरु यानाच्वनागु जानकारी वय्कलं बियादिल । लिसें वय्कलं धयादिल, 'सरकारं गज्याःगु आदेश बिल व जिमिसं पालना याये ।'

तर सरकारयाके आदेश काये न्ह्यः हे थःपिंसं न्हूगु भर्तीया लागिं ज्या धाःसा शुरु यानाच्वनागु जानकारी नं वय्कलं बियादिल ।

मेखे नेपाली सेनां न्हूगु भर्ती याःगु खं यानाः जनमुक्ति सेना दुने धाःसा तसकं निराशा ब्वलनाच्वंगु खँ धाःगु दु । शान्ति सम्झौताय् हस्ताक्षर यायेधुंकाः निगू सेनायात निगू हे कथंया व्यवहार यात धकाः माओवादी सेना तम्वयाच्वंगु खः ।