स्वयम् करं व्यापारी आतंकित
माओवादीया सम्पत्ति वैध यायेगु ज्याझवः
अकुट सम्पत्ति कमे यानाः नं उकिया कर मपुसे च्वनाच्वंपिं मनूतय्त करया दायराय् हयेगु ताः तयाः सरकारं शुरु याःगु स्वयम् आयकर घोषणा ज्याझवःयात कन्हय् माओवादीं व्यापारीतय्त ख्यानाः चन्दा म्हयेगु ज्याय् प्रयोग याये फइगु आशंका व्यापारीतय्सं याःगु दु ।स्वयम् आयकर घोषणा ज्याझवलय् मनूतय्सं थःपिंसं कमे यानातःगु सम्पत्तिया विवरण सरकारयात बुझे यानाः उकिया वापत १० प्रतिशत कर पूसा गाः । उलि कर पुल कि सरकारं वयागु सम्पत्तिया श्रोत न्यनी मखुसा वं बुझे याःगु सम्पत्ति विवरणया आधारय् वयात छुं नं कथंया मुद्दा नं लाइ मखु । सरकारं उमिगु सम्पर्ूण्ा विवरण गोप्य तयेगु जुइ धाःगु दु ।
तर सरकारं विवरण गोप्य यायेगु धाःसां नं थ्व विवरण कन्हय् वाईसीएल, क्रान्तिकारी मजदूर थेंज्याःगु माओवादीया भातृ संगठनया ल्हातय् लानाः उमिसं उकिया हे लिधं-साय् व्यापारीतय्त ख्यानाः चन्दा काः वइगु खः ला धइगु ग्याःचिकु थनया व्यापारीतय्त जुयाच्वंगु खँ धाःगु दु ।
अथे हे गुलिसिनं धाःसा सरकारं हःगु थ्व ज्याझवःयात न्हापा जनयुद्धकालय् माओवादीतय्सं थीथी थासय् लुटपाट यानाः मुंकातःगु सम्पत्तियात वैध यायेगु लागिं हःगु खः धाःगु दु ।
उगु इलय् चन्दा कयाः व लुटपाट यानाः माओवादीं मुंका तःगु आपालं सम्पत्ति आः नं गोप्य जुयाच्वंगु व आः उकियात पित हयेगु लागिं सरकारं थज्याःगु ज्याझवः हःगु दावी नं सूत्रं याःगु दु ।
उखे सरकारं धाःसा कर मपुसे सम्पत्ति मुंकातःपिं मनूतय् लागिं थ्व छगू अवसर खः धासें माघ मसान्त तकया दुने नं उमिसं कर मपुल धाःसा फागुनया न्हापांगु वालंनिसें उमिगु छेँय् छापा मारे यायेगु तयारी यानाच्वंगु दु ।
स्वयम् कर घोषणा ज्याझवलय् १० हजार करदातातय्सं कर पुलीगु आशा सरकारं यानातःगु दु । उकी मध्यय् सरकारं आशा यानातःपिं आपालं मनूतय्सं गोप्य कोड नम्बर कया यंकेधुंकूगु खँ अर्थ सचिव कृष्णहरि बास्कोटां धयादीगु दु । थुकिया म्याद माघ मसान्त तक जक खःसां आः तक थुकी ३ करोड तका जक मुंगु खँ नं धाःगु दु ।
