दुने दुने धाःसा मेगु हे तयारी

संविधान मवइगु घोषणा बाँकी / नेतातय् प्रतिवद्धता झंगःखँ

येँ (सन्ध्या टाइम्स)/बियातःगु इलय् हे न्हूगु संविधान जारी यायेगु धकाः स्वंगू तःधंगु दलया नेतातय्सं म्हिगः सार्वजनिक रुपं वक्तव्य बियाः प्रतिवद्धता प्वंकूसां दुनें दुनें धाःसा संविधानसभाया म्याद गय् यानाः थपे यायेगु धकाः राय परामर्श कायेगु ज्या नं न्ह्याकाच्वंगु खँ सीदुगु दु। न्हूगु संविधान जारी यायेगु ई थपे यायेत संविधान हे संशोधन यायेमालीगु जूगुलिं उकियात लागिं नं छगू पुचः सक्रिय जुइधुंकूगु खँ सूत्रं धाःगु दु ।

अथे खःसां दुनें दुनें थज्याःगु तयारी यानाः पिने धाःसा इलय् हे संविधान जारी यायेगु धकाः हस्ताक्षर यानाः वास्तवय् थ्व नेतातय्सं जनतायात मूर्ख जक दयेकाच्वंगु खः धकाः नं सूत्रं धाःगु दु ।

सूत्रया कथं संविधान इलय् बी मफइगु निश्चित जूगुलिं आः गय् यानाः न्ह्याः वनेगु धकाः तःधंगु स्वंगू दलया नेतातय् दथुइ आन्तरिक सहमति समेत जुइधुंकूगु दु। तर संविधान जारी याये फइ मखुत धकाः आधिकारिक रुपं गबलय् घोषणा यायेगु धइगु खँय् धाःसा सहमति जुइ फयाच्वंगु मदुनि। थुकिया आधिकारिक घोषणा यायेगु न्हि गबलय् जुइ फइ धकाः नं सहलह जुयाच्वंगु जानकारी सूत्रं बिउगु दु। आः दयेका तःगु कार्यतालिका कथं जक वंसां नं जेठ १४ प्रयाप्त मजूगु खँ धाःगु दु ।

सूत्रया कथं छुं जुयाः म्हिगः तःधंगु दलया नेतातय्सं प्रतिवद्धता प्वंकू थें जेठ १४ गते संविधान जारी या हे यात धाःसा व पूर्ण संविधान मखुसें संक्षिप्त संविधान जक जुइगु सम्भावना दु। नेतातय्सं आःयात संक्षिप्त संविधान जक जूसां जारी यायेगु मनःस्थिति दयेकाः थज्याःगु प्रतिपद्धता प्वंकूगु जुइमाः धकाः नं सूत्रं धाःगु दु ।

संविधान इलय् हे जारी यायेमाः धकाः माओवादीं धाःसा आन्दोलन न्ह्याकेगु धकाः तयारी यायेधुंकूगु दु। तर सूत्रं दावी याः कथं माओवादीं आः आन्दोलन घोषणा यायेत्यंगु धइगु नं संविधान जारी याये मफइगु अवस्थायात हे ध्यानय् तयाः खः। संविधान इलय् जारी मजुइ सातकि दक्षिणपन्थी शक्तितय्सं देशय् अराजक स्थिति ब्वलंकीगु खतरा दुगुलिं अज्याःगु स्थितियात नियन्त्रण यायेगु लागिं हे थःपिनि कार्यकर्ता परिचालन यायेत थ्व आन्दोलन घोषणा याःगु सूत्रया विश्लेषण दु ।