संविधान इलय् वइगु हानं छक्वः प्रतिवद्धता

आः वइगु जेठ १४ गते जारी यायेगु धकाः समयतालिका दयेकातःगु संविधान पाय्छि वकुन्हु हे जारी यायेगु धकाः तःधंगु स्वंगू दलं मंकाः वक्तव्य जारी याःगु नेपाली जनताया लागिं सुखद क्षण खः। तर अथे खयां नं वय्कः नेतातय् थज्याःगु प्रतिवद्धता व धापूयात जनतां गुलि तक पत्याः मयायेधुंकल धाःसां स्वंगू तःधंगु दलया नेतातय्सं थज्याःगु वक्तव्य जारी याःसां नं संविधान इलय् पिहां वइ धइगु खँयात अझ नं सुनां नं विश्वास यानाच्वंगु धाःसा मदुनि। संविधान जारी यायेत छुं ई जक ल्यं दनिगु अवस्थाय् वयाः स्वंगू दलया नेतातय्सं बिउगु थ्व वक्तव्ययात जनतां छगू कथंया न्ह्यइपुगु 'जोक' या रुपय् जक काःगु खनेदत। उगु वक्तव्ययात कयाः जनतां न्हिलेगु बाहेक मेगु छुं हे प्रतिक्रिया मबिउ ।

ख नं स्वंगू तःधंगु दलया थ्व वक्तव्य जनता न्हीकीगु विषयवस्तु बाहेक मेगु छुं खः धकाः पत्याः यायेगु आधार मदु। छाय्धाःसां नेतातय्सं वक्तव्य जक बिल वक्तव्य कथं ज्या यानाच्वंगु धाःसा पटक्क हे खने मदु। स्वंगू दलया बैठक धइगु हे कि भागबन्डा मिले यायेत च्वनी, कि सरकारया समीकरण हिलेत च्वनी। संविधान दयेकेत व संविधान दयेकेगु ज्याय् वयाच्वंगु समस्या चीकेत आः तक छगू हे अज्याःगु बैठक च्वंगु जनतां मसिउ। संविधान दयेकेत माःगु ज्या चाहिं छुं हे मयायेगु अले संविधान चाहिं इलय् हे पिकायेगु धकाः प्रतिवद्धता जक प्वंकाच्वनेगु खःसा अज्याःगु प्रतिवद्धताय् पत्याः यायेगु अंश म्हो जक दइगु स्वाभाविक खः। उकिं दलया नेतातय्सं आः प्रतिवद्धता प्वंकू थें न्हूगु संविधान तयार यायेत ज्या नं न्ह्याकल धाःसा प्रतिवद्धता प्रति नं प्रतिवद्ध खः धकाः पत्याः याये फइ ला?

More Stories Like this