मार्मिक संकिपा धाःसा पत्याः मजू

-नेवाः म्हसीका भाषा, धर्म, संस्कृति, आर्थिक अवस्था सुथां लाकेगु खःसा संकिपाय् जुजुकाजीं ल्ह्वंगु पलाखय् झी वने हे माः

वंगु ने.सं. ११३० चौलागा १३ कुन्हु येँया सांस्कृतिक संस्थानय् प्रिमियर शो क्यंगु नेपालभाषाया संकिपा खः - 'धाःसा पत्याः मजू' ।

जिगु नुगलं खं कथं संकिपाया दक्वं पक्ष सशक्त व धिसिलाः। नकारात्मक प्रभाव लाकीगु धिसुंधासुंया लु मदुगु तसकं बांलाः। शुरुंनिसें अन्त तकं न्ह्यइपुसे च्वं, कौतुहलतां जाः। नुगः खुलुलु मिंका बिउगु दु। अले नुगलय् छगू ह्यसः नं थना बिउगु दु कि जुजुकाजीं ल्ह्वंगु पलाखय् झी न्यासि वने फइ ला?

थौंकन्हय् नेवाः सामाजिक विधि व्यवहारय् थीथी कथंया भ्वासिपहः, देखासिखी व म्वाः मदुगु तडक भडकं धरग्वारा गये थें स्वारामारां थहां वनाच्वंगु दु। फुसां मफुसां, न्ह्याःसां म्हाःसां करंबरं हे थ्व धरग्वारा गयेमाःगु ल्वचं सकसितं हे बांमलाक चिना तये धुंकूगु खनेदु ।

झी नेवाःतय् बुसांनिसें मसीतले अले सीधुंकाः तक नं यायेमाःगु विधि व्यवहार व संस्कारत अःपुक, न्ह्याइपुक व यइपुक हनेगु पहः तना वनाच्वंगु दु। भ्वासिपहः, तडक भडक, देखासिखीं ग्यानापुक थाय् कया हयाच्वंगु दु। सुनां नं सुयातं सी मदयेक खने मदयेक दुःख बीगु जुयाच्वंगु दु। थ्व बांलाःगु पक्ष मखु। थ्व धइगु झीगु थःगु हे आर्थिक दुरावस्था जुया वनीगु ज्याखँया संकेत खः। गबलय् आर्थिक दुरावस्था जुइ अबलय् झीके छुं यायेगु आँट नं दइ मखु। झी ब्वः थें पक्क जुयाच्वनेगु हे जक जुइ। लिच्वः कथं झीगु रितिथिति, धर्म भाषा, संस्कृति, आर्थिक अवस्था फुक्क ख्यलय् कष्ट जुया वइ। नेवाः म्हसीका तना वनी, झीगु थाय्बाय् स्यना वनी। नेवाः इतिहास तना वनी। उकिं थ्व देखासिकी, भ्वासिपहः, तडकभडक धइगु विनासया छुमां खः ।

उकिं थज्याःगु विनास व विपत्तिपाखें तापाका च्वनेगु, झी नेवाः म्हसीका भाषा, धर्म, संस्कृति, आर्थिक अवस्था सुथां लाका तयेगु खःसा संकिपाय् जुजुकाजीं ल्ह्वंगु पलाखय् झी सकलें वने हे माः। ग्यानापुगु निर्णयय् थ्यनेधुंकूम्ह जुजुकाजीं अःपुगु निर्णय यानाः न्ह्याइपुक, यइपुक, हिसि दयेक सुकूभ्वय् न्यायेकाः म्ह्याय्यात बिया छ्वत। झी सकसिकें जुजुकाजीया थेंज्वःगु निर्णय यायेगु क्षमता व हिम्मत दयेके माल। आर्थिक म्हालासाला याये सयेके माल। थुकी हे झीगु कल्याण सुलाच्वंगु दु। नेवाः जुयाः च्वने फइगु लक्षण ज्वलन्त जुयाच्वंगु दु ।

More Stories Like this