न्हियान्हिं हे स्यना वनाच्वंगु प्रहरीया छबी

नेपाल प्रहरीया महानिरीक्षक रमेश चन्दं थीथी आपराधिक ज्याय् प्रहरीत नं संलग्न जुयाच्वंगु आपालं घटनात सार्वजनिक जुइवं प्रहरीया छबी तसकं बांमलात धकाः प्रहरी अधिकृततय्त आचरण सुधार यायेत अल्टिमेटम बियादीगु दु। वंगु छुं ई न्ह्यवंनिसें नेपाःया प्रहरीं नेपाली सुरक्षा स्थितियात जिक्व व्यंग्य यानाः प्रहरी फोर्सयात नं गाक्कं बदनाम यानाच्वंगु दु। जमिम शाहया हत्या, डलर लुटपाट, दोहोरी रेष्टुरेन्टय् प्रहरीयात दाया हःगु, डान्स रेष्टुरेन्ट संचालनय् प्रहरीयात नजराना आदि थज्याःगु घटनात दु गन प्रहरीया च्वय् थ्यंक च्वंपिं अधिकृतत हे संलग्न जुयाच्वंगु दु। नेपाःया प्रहरी थौंकन्हय् अपराधी ज्वनेगु सिबें अपराधीलिसे हे जानाः ध्यबा नयेगु ज्याय् अप्वः संलग्न जुयाच्वंगु दु। देशय् छुं अज्याःगु घटना जुल धाःसा उकियात प्रहरीं समाधान याना बी अथवा प्रहरीं थःत सुरक्षा बी धकाः सर्वसाधारण नेपाली जनतां पत्याः हे मयायेधुंकल। थज्याःगु अवस्थायात ध्यानय् तयाः जुइमाः, प्रहरी महानिरीक्षक चन्दं प्रहरी अधिकृततय्त आचरण सुधार यायेत निर्देशन बियादीगु। तर अधिकारीतय्त निर्देशन जक बियां थ्व समस्या ज्यनीगु धाःसा खने मदु। अन दुने जुयाच्वंगु अत्यधिक राजनीति, बांलाःगु थासय् सरुवा जुइत प्रहरीं प्रहरीयात हे घुस नकेमाःगु प्रथा आदि उन्मुलन मयाःतले मात्र निर्देशनं छुं जुइ मखु। स्वयम् महानिर्देशक चन्दया नियुक्तियात कयाः हे गपाय्धंगु काण्ड जूगु खः, सकस्यां सिउ। जब प्रहरीया उच्चपदय् हे थज्याःगु काण्ड दुसा क्वय्यापिंत निर्देशन बियां गनं समस्या ज्यनी? थुकिया निंतिं तःधंगु हे अपरेशनया आवश्यकता दु ।

More Stories Like this