देउवां कार्यकर्ता मुंका हल
पार्टीया नेतृत्व विवाद बारे कार्यकर्तालिसे सल्लाह
येँ (सन्ध्या टाइम्स)/नेपाली कांग्रेसया सभापति गिरिजाप्रसाद कोइराला मदयेसातकि कांग्रेस दुने शुरु जूगु नेतृत्व विवादय् आः थःपिंसं गज्याःगु पलाः न्ह्याकाः वने माली धकाः बिचाः ब्याकेत नेता शेरबहादुर देउवां कार्यकर्तात पुचः पुचः सःताः राय कायेगु ज्या न्ह्याकूगु दु ।
सूत्रतय्सं बिउगु जानकारी कथं थौंकन्हय् येँया कांग्रेस कार्यकर्ता सःताः थःपिनि बिचाः कायेगु ज्या यानादीगु खः। उगु इलय् वय्कलं कार्यकर्तातय्त थौंकन्हय् जुयाच्वंगु नेतृत्व विवाद बारे जानकारी बीगु ज्या नं यानादीगु खः। सूत्रया कथं वय्कलं न्हापा कोइराला दुगु इलय् हे थः लगायत सुशील कोइराला व रामचन्द्र पौडेलयात छथाय् तयाः थः धुंकाः देउवा प्रमुख नेता व वयां लिपा सुशील कोइराला व वयां नं लिपा रामचन्द्र पौडेल खः धकाः धया थकूगु जानकारी बियादीगु खः। भाजु देउवां सुशील व पौडेलया न्ह्यःने नं थ्वहे खँ धयादीगु खः। तर सुशीलं प्रजातन्त्रय् उत्तराधिकारी प्रथा मान्य जुइ मखु धासें देउवायात नेता माने यायेत अस्वीकार यानादीगु खः ।
कांग्रेस दुने देउवायात वरिष्ठ नेता धकाः अवैधानिक पद बियातःगु दुसा सुशील कोइराला उप सभापति जुयाच्वंगु दु। उकिं आः वैधानिक रुपं सुशील कोइराला हे पार्टीया कार्यवाहक सभापति जुइगु खनेदु ।
थज्याःगु अवस्थाय् आः थःपिनि भूमिका छु जुइ धकाः न्यनेकने यायेत देउवां कार्यकर्ता नापलायेगु शुरु यानादीगु खँ नं सूत्रं धाःगु दु। यदि पार्टी दुने नेतृत्वया विवाद तच्वया वन धाःसा कार्यकर्तापाखें जूसां दवाव सिर्जना याके मालीगु वय्कःया आशय खनेदुगु खँ नं सूत्रं धाःगु दु। वय्कःया थ्व ज्या न्हियान्हिथं हे जुयाच्वंगु दु ।
महाधिवेशन भदौपाखे
ताः ई न्ह्यः हे ई व थाय् क्वःछिनाः नं जुइ मफयाच्वंगु नेपाली कांग्रेसया महाधिवेशन आः मेगु दँया भदौ महिनाय् जुइफुगु खँ कांग्रेस सूत्रं धाःगु दु। कोइराला मदयेधुंकाः पार्टीया निगूगु पुस्ताया नेतातय् दथुइ भदौ महिनाय् महाधिवेशन यायेगु सहमति जूगु खँ धाःगु दु। यदि आः वइगु भदौ महिनाय् नं महाधिवेशन मजुल धाःसा निर्वाचन आयोगं पार्टीया वैधानिकता हे खारेज याये फइगु सम्भावना दुगुलिं अबलय् महाधिवेशन मयासें मगाःगु अवस्था दुगु खँ नं धाःगु दु। पार्टीया नेतातय्सं थ्वहे कथं तयारी समेत शुरु याःगु खँ नं सूत्रं धाःगु दु ।
