हिन्दू धर्मया नामं जुजु लित हयेगु षडयन्त्र

देशय् संवैधानिक राजतन्त्रयात हानं पुनर्वहाली यायेमाः धइगु सः ध्वं हाले थें सकभनं छक्वलं ताये दया वःगु दु। जनकपुरय् जानकी मन्दिरया दर्शन याः वंम्ह पुलांम्ह जुजु ज्ञानेन्द्रं नेपालं राजतन्त्र ला अझ नं वं थें मच्वंनि धकाः न्ववाःगुयां तुरुन्त हे लिपा पुलांम्ह प्रधानमन्त्री कृष्णप्रसाद भट्टराईं देशया वर्तमान अवस्थाय् २०४६ सालया संविधान कायम यानाः संवैधानिक राजतन्त्रयात हानं म्वाकेमाः धयाहःगु खः। आः वय्कःया धापू वःगुयां छन्हु लिपा हे कांग्रेस दुनेया भ्रष्ट नेता कथं कुख्यात खुमबहादुर खड्कां नेपालय् राजतन्त्र लिहां वयेफुगु सम्भावना मदुगु मखु धकाः ज्ञानेन्द्रयात हे समर्थन बिया हःगु दु। छुं ई न्ह्यः तिनि पशुपतिइ हिन्दू राज्यया माग यासें छम्ह भारतीय जोगीं याःगु यज्ञय् ब्वति काः वःम्ह ज्ञानेन्द्र शाहयात अन थ्वहे खुम बहादुर खड्कां लसकुस याःगु खः। उगु भेटया छुं ई लिपा हे खड्कां नं देशय् राजतन्त्र लिहां वयेफु धकाः बिचाः बियाहःगु स्वयेबलय् सीदु कि नेपालय् हिन्दू राज्य स्थापना यायेमाः धइगु नारा ज्वनावःपिं तत्वत आखिर हिन्दू राज्यया नामय् देशय् राजतन्त्र पुनर्स्थापना यायेगु अभिष्ट ज्वनाः सक्रिय जुयाच्वंपिं खः। नेपाःयात हिन्दू राज्य जुइमाः धाइपिं थ्व तत्वया लिउने छुं हे धार्मिक कारण मदु केवल जुजुयात लित हयेगु मकसद बाहेक। उकिं हिन्दू राज्यया नारा ज्वनाः वयाच्वंगु थ्व तत्वतपाखें देय्या सम्पूर्ण हिन्दू धर्मावलम्बी नं सतर्क जुइमाः। उमिसं हिन्दू राज्यया नारा बिल धकाः भावुकतावस उमिगु लिउ लिउ वन धाःसा उमिसं अन्ततः यंकीगु ज्ञानेन्द्रया क्वपुलांगु दरवारपाखे हे खः। उमिसं हिन्दूया नामय् यायेत्यंगु षडयन्त्र प्रति सकलें सजग जुइ हे माः ।

More Stories Like this