सदन व सतक निखेरं घेरे याइगु
माओवादीपाखें सरकार व संयन्त्रया नेतृत्वय् औपचारिक दावी
येँ (सन्ध्या टाइम्स)/एनेकपा (माओवादीं) क्वःछिनातःगु इलय् न्हूगु संविधान जारी यायेमाःगु व थःपिनि हे नेतृत्वय् राष्ट्रिय सरकार गठन यायेमाःगु माग यासें सदन व सतक निखेरं घेरे यायेगु तयारी याःगु दु। माओवादीं सदनय् नं सरकारक्वःथलेगु कुतः यायेगु नापं सतक नं कब्जा यानाच्वनेगु रणनीति दयेकूगु खः ।
सदनय् बहुमत दयेके फइगु अवस्था जुल धाःसा अविश्वासया प्रस्ताव यंकेगु नापं सतकय् नं मदिक्क हे प्रदर्शन यायेगु तयारी याःगु खँ माओवादीया छम्ह नेतां कनादीगु दु। थ्वहे झ्वलय् सतकय् तःधंगु प्रदर्शन याये कथं चैत्र २४ गते व बैशाख १८ गते जुलुस पिकायेगु ज्याझ्वः माओवादीं दयेकूगु दु ।
उखे थौं च्वंगु उच्चस्तरीय राजनीतिक संयन्त्रया मुँज्याय् नं
सरकार परिवर्तनया चर्चा जूगु खँ सीदुगु दु। उगु मुँज्याय् माओवादीपाखें औपचारिक रुपं हे सरकारया नेतृत्व व संयन्त्रया नेतृत्व थःपिंत बीमाः धकाः प्रस्ताव तःगु खः ।
कांग्रेस सभापति गिरिजाप्रसाद कोइराला मदयेधुंकाः वय्कःया हे नेतृत्वय् दुगु संयन्त्रया नेतृत्व सुनां कायेगु धकाः स्वंगू दल दथुइ बिवाद जुयाच्वंगु दु। थौंया बैठकय् थुकिया नेतृत्व सुनां कायेगु धकाः नं सहलह जूगु खः। थुकी कांग्रेसं नं दावी यानाच्वंगु दु ।
