अन्ततः संविधान इलय् मवइगु हे जुल

इलय् हे संविधान जारी यायेमाः धकाः दवाव बीत ज्ञापनपत्र लःल्हाः वंपिं प्रतिनिधि मण्डलयात सत्तारुढ पार्टी एमालेया अध्यक्ष झलनाथ खनालं लज्या हे मचासे संविधान इलय् जारी जुइ मखुत धकाः धयाहःगु दु। जनतां तःधंगु आशा यानाः पियाच्वंगु न्हूगु संविधान आः बियातःगु इलय् जारी जुइ मखुत धइगु खँय् सकलें राजनीतिक पार्टीत स्पष्ट जुइधुंकूगु दु। आः उमिसं संविधान इलय् जारी मजुल धाःसा जनतां उकिया विरुद्ध याइगु प्रतिकारयात गय् यानाः सामना यायेगु धकाः तयारी जक यानाच्वंगु जुयाच्वन। संविधान इलय् जारी जुइ मखुत धकाः आः घोषणा जक याये ल्यं दनि। पार्टीया छुं नेतातय्सं संविधान इलय् हे पिहां वइ, इलय् पिहां वये हे माः धकाः पिने धायेगु यानाच्वंगु ला केवल जनतायात ध्वं लायेत जक जुयाच्वन धइगु खँ थुकिं पुष्टि जूगु दु। उमिसं पिने संविधान इलय् जारी यायेमाः धकाः धायेगु यानाच्वंसां दुने दुने धाःसा इलय् जारी मयायेगु लागिं छु गज्याःगु संवैधानिक तयारी यायेमाःगु खः उकिया तयारी धकाःसा यानाच्वंगु जुयाच्वन। आः अन्तरिम संविधानय् संशोधन यानाः जूसां संविधानसभाया ई थपे यायेगु बारे सहलह जुयाच्वंगु खँ नं पिहां वःगु दु ।

संविधान इलय् पिहां मवयेत्यंगु थ्व च्वयेत ई हे मगाःगुलिं मखु। दलतय् दथुइ असमझदारी व अविश्वास ब्वलनाः खः। आः स्वला वा खुलाया ई थपे याःसां नं संविधान इलय् वइ धकाः आशा यायेगु थाय् मदु। उकिं ई थपे यायां अन्तिमय् संवैधानिक संकट पिकायेगु व अनं लिपा संविधान जारी हे मयायेगु कथंया ग्वसाः जकं देशय् जुयाच्वंगु मखु ला? दलतय् प्रति थज्याःगु न्ह्यसः पिदनीगु स्वाभाविक खः ।

More Stories Like this