जनबाहाःद्यःया जात्राय् नेवाः सहभागिता

सुजिव वज्राचार्य

जनबहाःद्यःया खः जात्रा थ्व पालय् तच्वकं झःझः धायेक क्वचाल। 'गबलें हे मजू थुगुसी थें', 'गुलि न्ह्यइपुक न्ह्यात जनबहाःद्यःया जात्रा', 'आहाः आः न्ह्याबलें थथे जुयावन धाःसा गुलि बांलाइ।' थुकथं जनबहाःद्यःया खः जात्रा क्वचाःगु न्हि वंगु शनिवाः लगमय् भक्तजनत हालाच्वंगु तायेदत। नेवाः संस्कृतिया धरोहर अले, नेपाःया हे तःधंगु जात्रा मध्ये छगू जनबहाःद्यःया जात्रा छुं नं विघ्नबाधा मवयेक क्वचाःगुलिं लसतां सकलें झःझः धाःगु खनेदत ।

येँया दकलय् तःधंगु अले राष्ट्रियरुपं हे महत्वपूर्ण जात्रा जनबहाःद्यःया जात्रा व कुमारी जात्रा छुं दँ न्ह्यवंनिसें अस्तव्यस्त जुजुं वनाच्वंगु खः। बांलाःगु व्यवस्थापन मदुगु कारणं धाये राज्यसत्तापाखें माःकथं ग्वाहालि मयाःगुलिं धाये अझ नेवाः सरोकार क्यने मफुगुलिं धाये थ्व निगुलिं जात्राय् न्ह्यइपुगु लकस झीगु न्ह्यःने वइगु सिबें अप्वः सन्त्रास जुइगु खः। जात्राया झ्वलय् जुइगु असामाजिक गतिविधि, गुण्डागर्दी, ई ब्यः मदयेक याः न्याइगुलिसें गनं गबलें द्यः थाइगु आदि इत्यादि समस्या ।

तर थ्व चिउताःयात नेवाः सरोकार क्यनाः पलाः छीवं थगुने विशेषतः नेवाः जागरण मञ्चं 'झीगु जात्रा पर्वय् सरोकार क्यने नु नेवाः जागरण हये नु' धइगु सांस्कृतिक नारा बियाः न्ह्यायेवं थुकी छगू लहर हल, थ्वहे लहर थ्व दँय् तक थ्यंबलय् छगू आकार कायेत सफल जुल ।

दकलय् न्हापां ला नेवाः जागरण मञ्चं थःगु कवः सुरक्षा मञ्चयात अनिवार्य रुपं जनबहाःद्यः जात्राय् स्वयम्सेवक परिचालन यायेगु निर्णय यासें थगुने द्यः सालीगु लागा भोताहिति, असं, बालकुमारी, जनबहाः, वंघः, मखं, चिकंमू, ज्याःबहाः, लगं दुने लाःगु फुक्क संघसंस्थाया प्रतिनिधित अले जनबहाःद्यःया गुरुजुपिं सःताः छगू भेला प्रदीप्त पुस्तकालयय् सःतूगु खः। उगु भेलाय् जात्रा सुरक्षाया निंतिं जात्राया लागाय् लाःगु जनसेवा प्रहरी, ट्राफिक प्रहरी कार्यालयया प्रतिनिधियात सःताः छलफल जूगु खःसा उकी नेवाः ल्याय्म्हतय्गु सहभागिता याकेगु निर्णय जुल। थ्वहे निर्णय लिपा वंगु दँय् जनबहाःद्यःया खःयात गनं हे विघ्नबाधा मजुइक याः न्यात। थुकिं छु क्यन धायेबलय् सांस्कृतिक रुपं झीसं जागरण हयेफत धाःसा नेवाः संस्कृति ल्यंका तयेत छुं नं थाकु मजू। थ्वहे उत्साह व जोश थुगुसी अझ अप्वः खनेदत। जनबहाःद्यःया गुरुजु नीलकाजी शाक्यं थ्व दँय् जनबहाःद्यः जात्रा न्ह्यः हे थीथी संघसंस्थायात सःताः जनबहालय् छगू भेला यानादिल। गुगु भेलाय् सभासद् भाजुपिं ध्यानगोविन्द रञ्जित, बुद्ध साय्मिलिसें महानगरपालिकाया प्रतिनिधि, संस्कृति मन्त्रालयया प्रतिनिधि, सुरक्षा निकायया प्रतिनिधिपिं सःतादिल। थ्व लिपा जनबहाःद्यः जात्राया समारोह समिति हे गठन जुल। थ्व नेवाः संस्कृतिया निंतिं मेगु उपलब्धि खः। थ्वयां तत्काल लिपा हे नेवाः जागरण मञ्चं जात्रायात कयाः नेवाः सरोकार क्यनेगु निंतिं जात्रा जुइगु लागाया क्लब, संघ संस्थात, असन सेवा समिति, भिंतुना गुथि, बालकुमारी क्लब, मच्छिन्द्र क्लब, वंघः क्लब, महादेव मखन क्लब, जनबहाः सर्वसंघ, मासंगाः नेवाः पुचः, ज्याबहाः ल्याय्म्ह पुचः, लगं खलः, नेवाः मुक्ति मोर्चा येँ जिल्ला समिति, अथेहे थुगु जात्रा लागाया वडा अध्यक्षत ३० वडाया पूर्व वडा अध्यक्ष चिनियामान बज्राचार्य, २७ वडाया पूर्व वडा अध्यक्ष बाबुराजा महर्जन, २५ वडाया पूर्व वडा अध्यक्ष विकासभक्त श्रेष्ठ, २० वडाया पूर्व वडा अध्यक्ष विजयकृष्ण श्रेष्ठ, २१ वडाया पूर्व वडा अध्यक्ष विद्यासुन्दर शाक्य अथेहे थुगु लागाय् सुरक्षा भाला लाःगु जनसेवा प्रहरी प्रभागया प्रहरी निरीक्षक अपदेश बिष्ट, जनबहाः द्यःया गुरुजु नीलकाजी शाक्ययात सःताः अन्तर्क्रिया ज्याझ्वः यात। थ्व ज्याझ्वलं जात्रायात अझ अप्वः व्यवस्थित यायेत थप उर्जा बिल। थुगु ज्याझ्वलय् वःपिं सकस्यां छप्वाः म्हुतु धइथें थ्व दँय् जनबहाःद्यः जात्रा तच्वकं भव्यकथं गनं नं छुं नं कथंया समस्या मवयेक न्ह्याकेगु खँय् भावनात्मक व व्यवहारिकरुपं सहमति जूगु खः। थुकिया लिच्वः जनबहाः द्यः सालेगु न्हापांगु न्हि तीनधारा पाठशालांनिसें असनय् तक नेवाः जागरण मञ्चया ल्याय्म्हतनिसें नेवाः मुक्ति मोर्चा व द्यः सालेगु लागाया संघसंस्था व क्लबया ल्याय्म्हतय्सं द्यः सालाः असनय् याः न्यायेकल। वयां कन्हय् कुन्हु असनंनिसें लाय्कू तक नं स्थानीय ल्याय्म्हतय्गु सहभागिताय् द्यः सालेगु ज्या जुलसा वयां लिपा लाय्कुलिं लगं तक नं स्थानीय ल्याय्म्हतय्गु व्यापक सहभागिताय् छन्हुं हे लगमय् थ्यंकाः मांसिमा छचाः चाःहीकल। थ्वया कन्हय् लगं खलःया ल्याय्म्हतय्गु विशेष व्यवस्थापनय् मांसिमा निचाः चाःहीकाः प्यन्हुया दुने न्ह्यइपुक द्यः जात्रा क्वचायेकल। थथे स्थानीय सहभागितां नेवाः सरोकार क्यनेगु झ्वलय् त्वाःत्वाःयापिं ल्याय्म्ह नेवाःत थःथःगु संस्थाया टिसर्ट पुनाः द्यः सालेगु ज्या यात। नेवाः जागरण मञ्चया कवः सुरक्षा मञ्चं जात्राया सुरक्षा भाला गुकथं काल अथे हे ज्याबहाः ल्याय्म्ह पुचः नं क्वःने गुगु नं हालतय् द्यः थाइ मखु धकाः बचं बियाः ज्याःबहाः ल्याय्म्ह पुचःया टिसर्ट पुनाः द्यः साः वल। लगमय् लगं खलःया सक्रियताय् बांलाःगु व्यवस्थापन यातसा मच्छिन्द्र क्लब व जनबहाःया ल्याय्म्हतय्सं घःचुकूया भाला काल। अथेहे नेवाः मुक्ति मोर्चा, असन सेवा समिति महादेव मखन क्लब, भिंतुना गुथि, मासंगाः नेवाः पुचःया ल्याय्म्हतय्सं द्यः सालाः थुगुसीया जनबहाःद्यः जात्रा झःझः धायेका बिल। जनबहाःद्यः सालेगु न्हापांगु न्हि द्यः सालेगु लागाया पूर्व वडा अध्यक्षपिं, नेवाः सभासद्पिं, राज्य सत्ताया संस्कृति स्वइपिं प्रतिनिधितय्सं नं ब्वति कयाः थ्व जात्राया महत्वयात अझ अप्वः जनमानसय् जागरण हयेगु अभियानय् बल तनादिल।

(च्वमि नेवाः जागरण मञ्चया संयोजक खः।)

More Stories Like this