उद्योग व्यवसायी तालाबन्दीपाखे

सरकारयात ताःचा लःल्हायेगु थौं अन्तिम न्हि

येँ (सन्ध्या टाइम्स)/देय्या उद्योग वाणिज्य ख्यःयात वयाच्वंगु ख्याच्वः, चन्दा आतंक, बन्द हडताल आदि थेंज्याःगु समस्या समाधान मजुल धाःसा थःपिनि औद्योगिक प्रतिष्ठानय् तालं ग्वसाः सरकारयात ताःचा लःल्हायेगु धकाः अल्टिमेटम बियाच्वंपिं उद्योग वाणिज्य ख्यःया प्रतिनिधितय्सं थौं प्रधानमन्त्री माधव नेपालयात नापलानाः थःपिनि समस्या समाधान मजुल धकाः गुनासो प्वंकूगु दु।
उद्योगी व्यापारीतय्सं सरकारयात ताःचा लःल्हायेगु धकाः बिया तःगु अल्टिमेटमया थौं अन्तिम न्हि खः। यदि थौं तकया दुने नं थःपिनि मागयात संवोधन मजुल धाःसा उमिसं कन्हय् सरकारयात ताःचा लःल्हायेगु ज्याझ्वः दयेका तःगु दु। व्यापारीतय्सं थःपिंत ज्यान तकं काये धकाः वयाच्वंगु ख्याच्वः जक मखु देशय् अप्वया वःगु उर्जा संकट समाधान यायेत नं इनाप याःगु दु ।

उखे प्रधानमन्त्री नेपालं देशया वर्तमान अवस्थायात कयाः थौं हे नेपाःस्थित थीथी देय्या राजदूततय्त नं नापलाइगु ग्वसाः दु। थौं बेलायत, जर्मनी आदि लगायत युरोपेली देय्या राजदूततय्त वालुवाटारय् सःताः थ्व वार्ता यायेत्यंगु खः। वय्कःपिंलिसे प्रम नेपालं खास यानाः जेष्ठ १४ गते संविधान जारी मजुल धाःसा पिहां वयेफुगु समस्याया बारे सहलह याये फुगु खँ धाःगु दु ।

उकिया नापं प्रम नेपालं देय्या समस्यायात कयाः थीथी राजनीतिक दलतलिसे न्ह्याकाच्वंगु वार्ता थौं नं जारी जुइ धाःगु दु। थौं वय्कलं राप्रपा नेपाल, सद्भावना पार्टी आदिलिसे वार्ता यानादीगु ग्वसाः दु ।

प्रम नेपालं छुं न्हि न्ह्यवंनिसें थीथी दलया नेतात सःताः वार्ता न्ह्याकादीगु खः। थ्व वार्ताया झ्वलय् वय्कलं राष्ट्रिय सरकार दयेकाः राजनीतिक निकास पिकायेगु लागिं थःपिं बाधक जुयाः मच्वनेगु खँ कनेगु यानादीगु खः। लिसें वय्कलं यदि माओवादीया स्वद्वः लडाकुयात नेपाली सेनाय् समायोजन यायेगु खःसा थ्व ज्या थम्हं तुरुन्त हे याना बी धकाः बचं बियादीगु खः ।

ओली न्हूदिल्लीपाखे
प्रधानमन्त्री माधव नेपाल न्हूगु राजनीतिक निकासया लागिं संवादय् व्यस्त जुयाच्वंगु इलय् लाक्क थुगु सरकार गठन यायेगु ज्याय् मू भूमिका म्हितादीम्ह एमालेया शक्तिशाली नेता केपी ओली धाःसा थौं भारतया न्हूदिल्ली झाइगु जूगु दु। थःगु नियमित स्वास्थ्य परीक्षण याकेत वय्कः न्हूदिल्ली झायेत्यंगु खः। वय्कः न्हूदिल्लीइ स्वन्हु तक च्वनाः स्वास्थ्य परीक्षण यानादीगु ग्वसाः दु। अन च्वनाजःछि वय्कलं भारतीय नेतातय्त नं नापलाइगु ज्याझ्वः दुसां सु सु नापलाइ धइगु खँ धाःसा मधाःनि। वय्कः चैत्र १९ गते येँय् लिहां झाइ ।