संकट वयेवं प्रमया परामर्श

राष्ट्रिय सरकार, संविधान व सेना समायोजन मू विषय

येँ (सन्ध्या टाइम्स)/जेठ १४ गते बियातःगु इलय् संविधान जारी याये फइगु सम्भावना म्हो जक खने दया वयेवं अज्याःगु अवस्थाय् छु याये माली धकाः बिचाः ब्याकेत प्रधानमन्त्री माधव नेपालं थीथी राजनीतिक पार्टीलिसे सहलह ब्याकूगु दु। वय्कलं थीथी दलया नेतातय्त थःथाय् सःताः थुकिया बारे बिचाः ब्याकादीगु खः ।

वय्कःलिसे संवाद याना वःपिं थीथी दलया छुं नेतातय्सं बिउगु जानकारी कथं प्रम नेपालं थ्व इलय् खास यानाः राष्ट्रिय सहमतिया सरकार, इलय् संविधान घोषणा यायेगु व सेना समायोजन बारे खँ ब्याकेगु यानाच्वंगु दु। वार्ताय् सःतीबलय् वार्ताया एजेण्डा थ्वहे धकाः धायेगु मयाःसां अन खँ शुरु याइबलय् धाःसा वय्कलं थ्व स्वंगू बुँदा मू रुपं न्ह्यःने तयेगु यानादीगु खँ धाःगु दु ।

यदि राष्ट्रिय सहमति तयार मजुल धाःसा संविधान जारी यायेत थाकुइगु जूगुलिं उकिया लागिं छु यायेमाली धकाः नं वय्कलं बिचाः कायेगु यानादीगु दु। राष्ट्रिय सहमतिया सरकार दयेकेगु खःसा माओवादीयात निं सरकारय् हयेमाःगु जूगुलिं माओवादीयात सरकारय् हयेत थःपिंसं माःगु तक भूमिका म्हितेत तयार दु धकाः नं वय्कलं धयादीगु खँ सूत्रं धाःगु दु ।

वय्कलं खँल्हाबल्हाय् संविधान दयेकेगु ज्या व सेना समायोजनया ज्या नापनापं हे न्ह्यायेमाः धकाः नं बिचाः तयादीगु खँ धाःगु दु ।

छखे संविधान इलय् जारी याये फइगु सम्भावना म्हो जुया वनाच्वंगु व मेखे संसदया अधिवेशन सःतेधुंकूगु कारणं सरकार विरुद्ध अविश्वासया प्रस्ताव नं तइगु सम्भावना दुगुलिं उकियात हे ध्यानय् तयाः प्रम नेपालं थ्व संवाद न्ह्याकादीगु दावी सूत्रं याःगु दु। थुकी वय्कलं थःगु पार्टीयात समर्थन मबउगु पार्टीया नेतातय्त नं सःतादीगु दु ।

उखे प्रमुख प्रतिपक्षी माओवादीं नं थःगु नेतृत्वय् न्हूगु सरकार गठन यायेगु बारे थीथी पार्टीतलिसे सहलह ब्याकाच्वंगु दु ।

पुनर्संरचना आयोग मदयेकेत इनाप
संविधान जारी यायेमाःगु ई न्ह्यःने थ्यंकाः राज्य पुनर्संरचना आयोग दयेकाः राज्य पुनर्संरचना सम्बन्धी ज्या यायेगु धकाः जुयाच्वंगु तयारीयात कयाः नेवाः स्वायत्त राज्य मंकाः संघर्ष समितिं थीथी दलया नेतातय्त नाप लानाः आःयात अज्याःगु ज्या मयायेत इनाप याःगु दु। समितिं उकुन्हु तिनि माओवादी अध्यक्ष प्रचण्डयात नापलानाः जनतापाखें निर्वाचित प्रतिनिधितय्सं सम्पन्न यायेधुंकूगु ज्यायात हानं मनोनिततय्गु पुचः दयेकाः उखेथुखे याये दइ मखु धकाः इनाप याःगु खः। लिसें समितिं संविधान संक्षिप्त व वृहत धइगु खँ जुइ मखु धासें बियातःगु इलय् पूर्ण संविधान जारी यायेमाः धकाः नं माग याःगु दु। प्रचण्ड लिपा थौं समितिया प्रतिनिधि मण्डलं सत्तारुढ पार्टी एमालेया अध्यक्ष झलनाथ खनालयात नापलायेत्यंगु दु ।