आखिर ज्ञानेन्द्रं छाय् थज्याःगु आँट यात?

पुलांम्ह जुजु ज्ञानेन्द्र शाहं थःत ला नेपालं राजतन्त्र धाथें वने हे धुंकल धइथें अझ नं मताःनि धकाः बियादीगु धापुतिं फुक्क हे राजनीतिक दलया नेतातय् न्ह्यः गायब जूगु दु। फुक्क दलया नेतातय्सं पुलांम्ह जुजु ज्ञानेन्द्रया थ्व धापू वय्कःया न्हिम्हगस जक खः धासें यदि लिपा लिपा नं थज्याःगु धापू न्ववाना जुल धाःसा जन कारवाही तक यायेगु जुइ धकाः ख्याच्वः बिया हःगु दु ।

खतुं थौंया इलय् पुलांम्ह जुजु ज्ञानेन्द्रया थ्व धापुती छुं दम दुगु मखु। अथे खःसां नेपाःया वर्तमान राजनीतिक गति गुगु मोड कयाः ब्वाँय् वनाच्वंगु खः उकियात इलय् हे सुधार याये मफुत धाःसा ज्ञानेन्द्रया न्हिम्हगस यथार्थय् परिणत जुइ मखु धकाः धाये फइगु अवस्था मदु। झिदँ ताःहाकःगु जनयुद्ध व १९ न्हुया जनआन्दोलनपाखें प्राप्त जूगु उपलब्धीत मध्ये छगू खः गणतन्त्र। तर देशय् शासन चले याइपिं राजनीतिक दलतय्गु नीति सही मजूगु कारणं जन आन्दोलनपाखें प्राप्त जूगु फुक्क धइथें उपलब्धीयात हाथ्या बीपिं तत्वत जन्मे जुया वःगु दु। भारतं वःपिं पाखण्डी बाबातय्सं धर्म निरपेक्षतायात हाथ्या बियाच्वंगु दुसा साम्प्रदायिक खस ब्राम्हणवादीतय्सं संघीय प्रणालीयात हाथ्या बियाच्वंगु दु। आः पुलांम्ह जुजु ज्ञानेन्द्रं गणतन्त्रयात हाथ्या बिया हल। राजनीतिक दलतय्सं थज्याःगु छुं नं हाथ्यायात सटिक रुपं प्रतिकार यायेगु ज्या मयाः। अःखतं उकियात हे बः बीपिं किटाणुत फुक्क दल दुने जन्म जुयाच्वंगु दु। वास्तवय् वहे कारणं नं पुलांम्ह जुजुं थथे धायेगु आँट याःगु खः। दलया नेतातय्सं ज्ञानेन्द्र छम्हेसिया जक मखु मेमेगु तत्वतय्त नं कडा रुपं प्रतिकार यायेगु हिम्मत यायेमाः ।

More Stories Like this