पूर्वांचलय् नं नेवाः मिसाः खलः

पूर्वांचलया झापा जिल्लाय् न्हापांखुसी मिसा खलः निस्वंगु दु । वंगु ने.सं. ११३० चिल्लागा द्वादशी खुन्हु जूगु छगू मुँज्यां ''नेवाः देय् दबू मिसा खलः तोपगाछि झापा''या नामं थुगु खलः निस्वंगु खः ।

झापा जिल्लाया अध्यक्ष नेत्र श्रेष्ठ व नेवाः देय् दबू झापा जिल्ला अध्यक्ष श्रीकृष्ण उदासया मू पाहाँसुइ निस्वंगु थुगु खलकय् नायः मय्जु रोजिना जोशी, न्वकू मनका श्रेष्ठ, छ्यांजे सरस्वति श्रेष्ठ, ल्यू छ्यांजे गंगा श्रेष्ठ, दांभरि माया श्रेष्ठ च्वनादीगु खःसा दुजलय् मय्जु मिना श्रेष्ठ, अम्बिका श्रेष्ठ अथेहे सल्लाहकारय् मिथिला कर्माचार्य व रेवती श्रेष्ठ च्वनादीगु खः ।

थुगु मिसा खलः निस्वनेत तोपगाछीया मिसापिनिगु मूवंगु भूमिकायात च्वछासें नेवाः देय् दबू झापा जिल्ला अध्यक्ष श्रीकृष्ण उदासं बधाइ व भिन्तुना बियादिल । नापं थुगु खलः पाखें जःलाखःलाया गाविस व नगरया मिसापिंसं नं प्रेरणा कायेमाःगु खँय् बः बियादिल । अथेहे झापा जिल्लाया दुजः मय्जु गंगा श्रेष्ठजुं नेवाः मिसापिंसं थःगु जाति म्हसीका ल्यंकातय्त दक्वं ज्याझ्वलय् थःगु हे परम्परागत वसःत पुना ब्वतिकयादीत इनाप यानादिल ।

More Stories Like this