सत्यहेरा अनुसन्धान सिरपाः विपिन कपालीयात

थुगुसीया सत्यहेरा अनुसन्धान सिरपाः भाजु विपिन कपालीयात लल्हाःगु दु । म्हिगः संचवाः नेपालभाषा केन्द्रीय विभाग यलध्वाखा, यलय् छगू ज्याझ्वःया दथुइ उगु सिरपा लःल्हाःगु खः ।

नेपालभाषा केन्द्रीय विभाग यलय् जूगु उगु ज्याझ्वलय् नेपाःया भाषिक सर्वेक्षणया वरिष्ठ दुजः प्रा. डा. चुडामणि बन्धुं सिरपाः कथं झिद्वः तका दां व दसिपौ लःल्हानादीगु खःसा सत्यहेरा अनुसन्धान सिरपाः समितिया नायः प्रा. प्रेमशान्ति तुलाधरं खादागा नापं स्वां देछानादीगु खः । भाजु विपिन कपालीं च्वयादीगु '' सिंहल सार्थवाह व थँबही : छगू अध्ययन'' शोधग्रन्थया निंतिं उगु सिरपाः बिउगु खः । उगु शोधग्रन्थयात कयाः सिरपाः समितिया दुजः प्रा. डा. सुन्दरकृष्ण जोशीं न्ववानादीगु खः ।

ज्याझ्वलय् विश्व विद्यालय अनुदान आयोगया ग्वाहालीं नेपालभाषा केन्द्रीय विभागं न्ह्याकेत्यंगु ''नेपालभाषाया समाजभाषा वैज्ञानिक सर्वेक्षण परियोजना''या बारे नं प्रा. डा. जोशीं कनादीगु खः । अनुसन्धान सिरपाः समितिया दांभरि हिराकाजी महर्जनं लसकुसया नापं सिरपाःया बारे कनादीगु उगु ज्याझ्वलय् नेपालभाषा केन्द्रीय विभागया सल्लाहकार नापं नेपालभाषा समितिया दुजः प्रा. डा. त्रिरत्न मानन्धर लुम्बिनी बौद्ध विश्वविद्यालयया उपकुलपति जुयादीगुलीं भिन्तुना नापं हनेज्या जूगु खः । ज्याझ्वलय् त्रिभुवन विश्वविद्यालयया भाषा विज्ञान केन्द्रीय विभागया नायः नापं नेपाःया भाषिक सर्वेक्षणया नायः सह प्रा. दानराज रेग्मीजुं नं न्ववानादीगु खः ।

सत्यहेरा अनुसन्धान सिरपाः समितिया नायः नापं नेपालभाषा केन्द्रीय विभागया नायः प्रा. प्रेमशान्ति तुलाधरया सभापतित्वय जूगु उगु ज्याझ्वलय् मदुम्ह पुलांम्ह प्रधानमन्त्री नापं नेपाली कंग्रेसया सभापति गिरीजा प्रसाद कोइराला, लिपि विशेषज्ञ नापं बौद्ध विद्वान भाषा थुवाः हेमराज शाक्य व नेवाः देय् दबूया संस्थापक नायः भक्तिदास श्रेष्ठयात श्रद्धांजलि देछाय्कथं छगू मिनट मौन धारण नं याःगु खः ।

थुगु सिरपाः मय्जु उजेली डंगोलं मां हेरामाया डंगोल व अबु सत्यमान सिंहया लुमन्ती नेपालभाषाया साहित्य संस्कृति व भाषा ख्यलय् अनुसन्धान यायेगु ज्याय् तातुनां थुगु सिरपाः नीस्वनादीगु खः ।

More Stories Like this