ज्ञानेन्द्रं न्ववायेवं बबाल

तर धर्म व संघीयता विरुद्ध धाःसा दलत छाय् मौन?

येँ (सन्ध्या टाइम्स)/पुलांम्ह जुजु ज्ञानेन्द्रं म्हीग जनकपुरय् 'देशं राजतन्त्र वं थें ला जितः मच्वंनि' धकाः बियादीगु अभिव्यक्तिं देय्या राजनीतिइ तःधंगु हे तरंग थना बिउगु दु। भाजु ज्ञानेन्द्र शाहं बियादीगु उगु धापूयात कयाः थीथी राजनीतिक पार्टीया नेतातय्सं कडा प्रतिक्रिया बिया हःगु दुसा उखे जुजुवादी पुलांपिं पञ्चतय्सं धाःसा छम्ह नागरिक जुइधुंकूम्ह मनुखं राजतन्त्रया बारे थःगु बिचाः बिउबलय् छाय् अपाय्च्वः बबाल यायेमाःगु धकाः मेगु प्रतिक्रिया नं बियाहःगु दु ।

नेपाली कांग्रेसया नेता रामचन्द्र पौडेलं पुलांम्ह जुजुया थ्व बिचाः दिवास्वप्न जक खः, थ्व गबलें पूवनी मखु धयादीगु दुसा माओवादीया न्वकु डा. बाबुराम भट्टराईनं बाः वनेधुंकूगु खुसि लिहां वइ मखु धासें आः थःपिंसं थुकिया विरुद्ध नं जनतायात सचेत यायेगु अभियान चले यायेगु जुइ धयादिल ।

पुलांम्ह जुजुया थ्व धापूयात कयाः फुक्कं हे राजनीतिक दलतय्सं कडा प्रतिक्रिया बियाहःगु सकारात्मक हे खः। तर राजतन्त्र हानं वइ तिनि धाःगु खँय् राजनीतिक दलत तसकं आक्रोशित जुइगु अले धर्म निरपेक्षता, संघीय व्यवस्थाया विरोधय् न्ववाना हयाच्वंगु धापूयात कयाः धाःसा सुं नं दलं न्वमवाःगु खनाः गनं अज्याःगु मुद्दाय् चाहिं फुक्कं राजनीतिक दलतय्गु सहमति जकं दुगु खः लाकि धइगु न्ह्यसः पिकया बिउगु दु ।

जनआन्दोलन भाग २ या उपलब्धी धइगु गणतन्त्रया स्थापना जक मखु हिन्दू राष्ट्रयात खारेज यानाः धर्म निरपेक्ष राज्यया घोषणा व राज्य पुनर्संरचना यानाः संघीय प्रणालीइ वनेगु धइगु नं खः। तर गणतन्त्रया विरोध जुयाः राजतन्त्रया पक्षय् खँ पिहां वयेवं फुक्कं दल व खास यानाः मिडियां समेत उकिया विरोध याना हल। तर थ्वहे पुलांम्ह जुजुं छुं ई न्ह्यः तिनि नेपाःयात धर्म निरपेक्ष यायेगु मखु हिन्दू राष्ट्र हे यायेमाः धाःबलय् धाःसा सुनां नं विरोध मयाः। अझ हिन्दू राज्यया पक्षय् जूगु समारोहय् पुलांम्ह जुजु ज्ञानेन्द्र व कांग्रेस, एमाले, माओवादीया नेतात समेत छगू हे होमय् सरिक जूगु खँ तक नं पिहां वल ।

थौंकन्हय् संघीय व्यवस्था धइगु जि हे मजिउ धकाः थुकिया विरुद्ध प्रतिकार समिति हे गठन यानाः समेत ज्या शुरु यानाच्वंगु दु। उकियात नं राजनीतिक पार्टीतय्सं विरोध मयाः। अझ वहे पार्टीया गुलिखे कार्यकर्ता समेत उकी लगे जुयाच्वंगु दु ।

जनआन्दोलनं स्थापना याःगु गणतन्त्रया विरोधय् सः पिहां वयेवं फुक्क हे दलत क्रुद्ध जूसां वहे जन आन्दोलनया उपलब्धी कथं चूलाःगु धर्म निरपेक्षता व संघीय व्यवस्थाया विरोधय् पिहां वःगु सःयात कयाः धाःसा दलतय्सं छुं हे प्रतिक्रिया मबिउगुलिं थनया तःधंगु राजनीतिक दलतय्त केवल गणतन्त्र जक दःसा गाःगु तर राज्य पुनर्संरचना व सामाजिक रुपान्तरण धाःसा उमित माःगु विषय मखुगु खत लाकि छु धकाः आशंकापूर्ण न्ह्यसः तयेगु थाय् पिहां वःगु दु ।