निगूगु पुस्तां क्यना हल कुर्सीया लोभ

नेपाली कांग्रेसया सभापति गिरिजा प्रसाद कोइरालाया घःसू हे सिमधःनिवं उकिया निगूगु पुस्ताया नेतातय् दथुइ नेतृत्व सुनां कायेगु धइगु खँयात कयाः कचवं पिहां वःगु दु। कोइराला मदयेवं आः कांग्रेसयात हानं छक्वः न्हापा थें हे 'ट्रोइका' या अवधारणा कथं न्ह्याकीगु खः लाकि धकाः विचाः पिहां वयाच्वंगु इलय् नेतृत्वया दावेदार जुयाच्वंपिं शेर बहादुर देउवा, सुशील कोइराला व रामचन्द्र पौडेल दथुइ कचवं शुरु जूगु दु। थ्वय्कःपिं स्वम्हेसित 'नेता त्रय' माने यायेत पार्टीया शक्तिशाली पंक्ति तयार मजुइवं ट्रोइका अवधारणां पिहां वयाः पार्टी हाकनं एकल नेतृत्वय् हे वने मालीगु अवस्था पिहां वःगु खः। तर एकल नेतृत्वया जिम्मा काइम्ह सु धइगु खँय् धाःसा विवाद ब्वलंगु दु। त्रय धकाः न्ह्यःने वःपिं स्वम्हेस्यां नं थःथःपिंत हे शीर्ष तायेकूगु कारणं थ्व विवाद वःगु खः ।

२०५३ सालय् एमालेया तत्कालिन महासचिव मदन भण्डारी मदयेवं अन दुने नं नेतृत्वय् सुयात हयेगु धकाः तसकं विचार विमर्श न्ह्याःगु खः। तर अबलय् एमाले छधी जुयाः माधव नेपालयात नेतृत्वया जिम्मा बीगु धकाः निर्णय यात व एकताया बलं पार्टी सफल नं जुया वन। आः कांग्रेसं नं एमालें अबलय् याःगु ज्यापाखें शिक्षा कायेमाः। आः पिहां वःगु विवादं पार्टीया एकता स्यंकीगु ला द हे दु, लिसें थ्व धुंकाः न्ह्याम्ह हे व्यक्ति नेतृत्वय् वःसां वयात असफल यायेगु वातावरण नं तयार याना बी। थ्व इलय् कांग्रेसया नेतृत्व ला खँ हे त्वःते कार्यकर्ता तक नं असफल व कमजोर जुइ मजिउ। निगूगु पुस्ता लोभ, लालच व स्वार्थया घेरां पिहां वयेमाःगु दु ।

More Stories Like this