संचवाः नेपालफेस्ट III

विशेष कारणं दिनाच्वंगु नेपालफेस्ट III कन्सर्ट थ्वहे वइगु मार्च २७ संचवाः जुइगु जूगु दु । थुगु ज्याझ्वः नेवाः अर्गनाइजेशन अफ अमेरिकां यायेत्यंगु खः ।

सं.रा.अमेरिकाया भर्जिनिया स्टेट, फल्स चर्चय् जुइत्यंगु थुगु ज्याझ्वलय् नांजाःम्ह म्ये हालामि प्रकाश श्रेष्ठलिसें फिरोज स्याङदेन, न्यूयोर्कया संसार ब्याण्ड, संजीप प्रधान, शरिश्मा अमात्य, श्रीजन ताम्रकार आदि कलाकारपिनिगु वेजोड प्रश्तुति दइगु खँ धाःगु दु । ज्याझ्वलं वइगु मुक्कं ध्यबापाखें झिंन्यागू प्रतिशत नेवा अर्गनाइजेशन अफ अमेरिकाया छात्रवृति कोशयात व मेगु झिंन्यागू प्रतिशत नेप्लीज इजुकेश्नल कल्चरल सेन्टरयात लःल्हायेगु खँ अर्गनाइजेशनया नायः राजेश श्रेष्ठजुं नेपालमण्डलयात कनादीगु दु ।

लुमंकेबहः जू, नेवाः अर्गनाइजेशन अफ अमेरिकां नेपाःया जगतसुन्दर ब्वनेकुथिइ ब्वनीपिं विद्यार्थीपिन्त छात्रवृति बिया वयाच्वंगु दु ।

More Stories Like this