षडयन्त्रया न्हापांगु पलाः - ह्विप ऐन

न्हूगु संविधान दयेके धकाः वःपिं संविधानसभाया सभासद्तय्त नं ह्विप लागू जुइ कथंया कानून हयाः सरकार नापं तःधंगु राजनीतिक दलतय्सं जनतां चाहना यानाच्वं कथंया संविधान मदयेकेगु सन्देश बिउगु दु। संविधानसभाय् उल्लेख याइगु बुँदाया बारे मतदान जुइबलय् सभासद्तय्सं थःपिनि स्वविवक छ्यले दइ धकाः न्हापा यानातःगु व्यवस्थायात खारेज यानाः आः उकी थःगु स्वविवेक छ्यलेगु मखु पार्टीं गन भोट ति धाल अन हे तयेमाः धइगु न्हूगु प्रावधान हःगु खः। थुकिं यानाः सभासद्त थःगु आस्था व बिचाःया आधारय् मत बीगुपाखें पूर्ण तयाः बञ्चित जूगु दु।
थौंकन्हय् दलतय् दुने जुयाच्वंगु वादविवाद स्वयेगु खःसा थुमिसं न्हापा संविधानसभाया चुनावय् जनताया न्ह्यःने गुगु घोषणापत्र प्रस्तुत यानाः भोट फ्वंगु खः आः उगु घोषणापत्रया विपरित वनाः संविधान दयेकीगु संकेत खने दयावःगु दु। थ्व अर्थय् आः चुनाव त्याका वःपिं सभासद्तय्सं चुनावया इलय् जनतायात गुगु बचं बिया वःगु खः उकी हे तक नं भोट तये मखनीगु जूगु दु। यदि तल धाःसा उमिगु सभासद् पद तकं खारेज जुइगु खतरा दु। चुनावया इलय् छगू दस्तावेज बीगु तर संविधान दयेकेगु इलय् उकिया अःखः बुँदाय् भोट बिउ धकाः सभासद्तय्त ह्विप जारी यायेगु धाथें नं विडम्बना खः। राजनीतिक पार्टीतय्सं संविधानसभाया चुनाव व चुनावया इलय् जनतायात बिउगु बचं प्रति याःगु थ्व ति 'भद्दा मजाक' मेगु छु जुइ? ह्विप सम्बन्धी थ्व ऐन वर्तमान संविधानसभायात थुकिया मूल एजेण्डां पिने यंकाः जनतायात संविधान मखु मात्र भ्वंया थू छथु ज्वंकेगु षडयन्त्रया न्हापांगु पलाः खः ।

More Stories Like this