नेपाः नं पुलांगु जापान थें च्वं

सुनिता मानन्धर

मास्तुसाकि सायोको, ७३ दँ

जिगु जन्म जापानया खागोयासिभाय् जूगु खः। अन सारस यक्व हे दु। थाय् नं न्ह्यइपुसे च्वं। जितः मचांनिसें प्याखं हुले तसकं यः। जापानया परम्परागत प्याखं हुले तसकं थाकु। यक्व हे कुतः यायेमाः। जिं स्टेजय् नं यक्व हे प्याखं हुला।
अबलय् जापान नं नेपाः थें च्वं। छम्हं मेम्हेसित न्ह्याःगुं आपत विपतय् नं ग्वाहालि याइ। थौंकन्हय् ज्या यायेगु लागिं काय् म्ह्याय्पिं तातापाःथाय् च्वं वनी। न्हापा अथे मखु। सकलें छेँजःपिं नापं च्वनी। गाडी नं यक्व मदु। आपाः यानाः न्यासि हे वनी। साइकल गइपिं यक्व दु। अबलय् पासापिं सकलें मुनाः न्ह्यइपुसे च्वंकेगु जितः थौं तलें लुमं। जि मचाबलय् खुसिइ पौडी म्हितः वनेगु। स्कूलं लिहां वयेधुंकाः लँय् हे म्हितेगु नं याना ।

जिमि मांबौनं तसकं दुःख सिउ। मांबौ बुँज्या याइगु। जिपिं च्याम्ह तःकेहेँ मध्ये खुम्ह कुमामोतोय् जन्म जूपिं। जिमि ततापिं यक्व दुगुलिं जिं इमिसं थें दुःख सी म्वाःल।
जि मचाबलय् अमेरिकानाप जापानया ल्वापु जूगु खः। अबलय् हवाई फायर याइगुलिं तसकं ग्यानापुसे च्वं। गन गन मनू खने दत अन अन फायर याना हइगु। अथे जुयाः स्कूल नं दक्वं बन्द यात। सकलें मस्तय्त मन्दिरय् तयेयंकल। मन्दिरय् हे आखः ब्वंकेगु यात। जिमित मन्दिरया स्वाहानेय् तयाः आखः ब्वंकल। बहनी नं लिबाक्क तक आखः ब्वंकीगु। थाय्थासय् ल्वापु जूगुलिं नयेगु नसाया किमोनो (जापानया लं) तसकं मू वं। जिमि मामं थःगु किमोनो बियाः जाकि कया हयाः जिमित नकेगु याइ। पसल्यातय्सं ध्यबा बिल कि जाकि बी मखु किमोनो बिउसा जक जाकि बीगु ।

छन्हु ततानाप बुँज्या यानाच्वनागु। अन छत्थुं हे हवाई फायर जुल। जिपिं निम्हं छगू बल्चाय् सू वना। अन गोलीं लानाः चाया धुफ्वः दनाः बुँ छगुलिं खिउँसे च्वन। जिमिसं मिखा हे कने मफुत। जि ग्यानाः तसकं हाला। ततां हाले मजिउ, सः पिकाये मते धाल। अनं जिपिं निम्हं बचे जुल। अबलय् न्ह्याथाय् वंसां ग्याना जुइमाः। बहनी गनं पिहां वने मजिउ। जि स्कूलय् ब्वनाच्वनागु इलय् अंग्रेजी भाय्या सफू छपाः छेँय् दुगु खः। सालुगु भ्वंयागु सफू जूगुलिं न्हि कायेत जिउ धकाः जिं स्कुलय् ज्वना वना। अंग्रेजी भाय्या सफू खनेवं गुरुबानं ब्वः बिउगु जितः थौंतले लुमं। जापानय् नि.मा.बि.इ थ्यंकाः जक अंग्रेजी ब्वंकी ।

न्हापा जापानय् स्कर्ट व किमोनो पुनीपिं आपाः दु। ब्याहा जुइवं जिं नं किमोनो पुनेगु याना। थौंकन्हय् किमोनो पुंपिं उलि मंत। न्हापा तरकारीया सवाः नं तसकं साः। थौंकन्हय् तरकारी स्वयेबलय् बांलाःसां न्हापाया सवाः छप्तिं मवः। थौंकन्हय् बुँज्या याइपिंसं नाना कथंया साः तइ। जितः ला थौंकन्हय् नये मजिउगु नसा नयाच्वनागु थें च्वं ।

हाइस्कुल क्वचायेकाः जि ब्यूटिसियन तालिम कया। अबलय् थौंकन्हय् थें मौका मदु। ज्या सयेकाः दछि तक तलब हे मकासे ज्या याना। अनं लिपा भचा तलब बीगु यात। जि व तता नापं च्वनेगुलिं उलि थाकु मजू। ततां ट्याक्स पुली। जिं नसा ज्वलं हये ।

जि पीन्यादँ न्ह्यवंनिसें ओसाकाय् च्वं च्वना। न्हापा अन लँय् छचालं चिचीधंगु रेल दु। थुकिं अःपुक हे थाय् थासय् थ्यंका बी। अथे ला थाय्थासय् गाडी नं दु। तर गाडीइ जुइपिं स्वयां थुकी जुइपिं अप्वः दु। थुकी गाडीया भाः स्वयां दं। अबलय् छेँ नं ततःजाःगु मदु ।

नीदँ न्ह्यःनिसें जि सुस्त मनस्थिति व बुराबुरीपिं च्वनेगु थासय् स्वयंसेविका कथं ज्या यानाच्वनागु दु। अन ज्या यायेबलय् मन हे याउँसे च्वं। अन ल्हाः तुति चले मजूपिं निसें मू तक हे पुले मफुपिं मनूत तकं दु। न्यय्दँ थ्यंम्ह छम्ह मनुखं मचांनिसें थौंतले मिखा तकं कंगु मदुनि। व थःगु हे संसारय् दुनाच्वंगु थें च्वं। वं छुं सवाः नं मसिउ। बांलाः बांमलाः नं मसिउ। जिं वयात थ्व सूप, थ्व तरकारी धाधां बुलुहुँ बुलुहुँ नकेबलय् मिखा हे मकंसां नइ। जितः तसकं न्ह्यइपुसे च्वनी ।

जि झिंन्यादँ न्ह्यः दकलय् न्हापां नेपाः वयागु खः। थौंतकया दुने जि यक्व हे नेपाः वये धुन। नेपाः नं न्हापा स्वयां यक्व हे पायेधुंकल। अथे जूसां नेपाः वयेबलय् जितः न्हापाया जापान थें च्वं। तर थःगु देय्या लागिं छुं यायेमाः धइगु बिचाः थौं सकलें मस्तय्त स्यनेमाःगु दु। थौं मनूतय्के गुगु मानवताया भावना तना वनाच्वंगु दु। उकियात मचांनिसें हे थने माःगु दु।
जिगु जीवनय् थौंया ई जिगु लागिं तसकं न्ह्यइपुगु अले बांलाःगु ई थें च्वं। जिं सुयातं ग्वाहालि याये खनाः जिगु जीवन सार्थक जू थें च्वं। उकिं मनू जुयाः जन्म जुसेंलि बांलाःगु मन तयाः थम्हं फुचाःगु कुतः यानाः सकसितं ग्वाहालि यायेगु भावना ब्वलंका वने फयेमाः ।

More Stories Like this