माओवादीया स्वंगू धक्का

इलय् संविधान जारी याकेत निरन्तर धक्का कार्यक्रम

चैत्र २४: स्वगू लाखया धक्का / वैशाख १८: झिगू लाखया धक्का / जेठ १४: राजधानी छगुलिं जाम

येँ (सन्ध्या टाइम्स)/देशय् संघीयता विरोधी व धर्मनिरपेक्षता विरोधीतय्सं चलखेल यानाः गणतन्त्रयात संकटय् लाकेत्यंगु ठहर यासें क्वःछिनातःगु इलय् हे जनताया गणतान्त्रिक न्हूगु संविधान जारी यायेमाः धइगु माग यासें माओवादीं छसिकथं कडा जुजुं वनीगु 'धक्का कार्यक्रम' याइगु जूगु दु ।

दकलय् न्हापांगु धक्का थ्वहे वइगु चैत्र २४ गते बीत्यंगु दु। जनआन्दोलन दिवस हनेगु कथं येँय् लखौं मनू क्वकयाः उगु धक्का बीगु तयारी यानाच्वंगु खँ माओवादीया छम्ह नेतां 'सन्ध्या टाइम्स'यात कनादिल ।

उकिया तयारी कथं थौंकन्हय् स्वनिगः नापं देय्न्यंकं हे प्रशिक्षण बीगु व थीथी कथंया ज्याझ्वः यानाच्वंगु दु ।

थ्व न्हापांगु धक्का धुंकाः वया सिबें न्यादुगं तःधंगु निगूगु धक्का बैशाख १८ गते मजदूर दिवस कुन्हु बीगु तयारी दुगु खँ धाःगु दु। वकुन्हु नं लखौं मनूत सतकय् क्वकयाः इलय् संविधान मवल धाःसा छुं नं जुइफु धकाः ख्याच्वः बीगु ज्या जुइ धाःगु दु। अनं लिपा अन्तिम धक्का कथं संविधान घोषणा याइगु न्हि अर्थात जेठ १४ गते प्रदर्शन जुइ धाःगु दु। बैशाख १८ गते तकया दुने न्हूगु संविधान जारी जुइ ला कि मजुइ धइगु स्पष्ट जुइगु जुयाः सम्भवतः बैशाख १८ गतेनिसें न्हिंन्हिं हे सतकय् कुहां वयाः कशब्जा यायेफु धाःगु दु।
थ्व स्वंगुलिं धक्काया पूर्व तयारी कथं वइगु चैत्र १८ गते माओवादीया आदिवासी जातीय क्षेत्रीय महासंघया ग्वसालय् संघीयता विरोधीतय्गु विरुद्ध येँय् छगू तःजिगु प्रदर्शन यायेत्यंगु दु। उकिया नितिं नं प्रशिक्षण व थीथी कथंया ज्याझ्वः यानाच्वंगु खँ सीदुगु दु ।

दलतय्गु मिखाय् जनताया गणतन्त्र
माओवादीं धायेगु यानाच्वंगु 'जनताया गणतन्त्र'यात माओवादीया अधिनायकत्व दुगु अर्थात सर्वहारावर्गया अधिनायकत्व दुगु व बहुदलयात अस्वीकार याइगु गणतन्त्र खः धकाः थुइकेगु यानाच्वंगु खनेदु। उकिं कांग्रेस, एमाले नापं थीथी पार्टीया नेतातय्सं माओवादीया उगु खँयात अस्वीकार याना वयाच्वंगु खः। तर माओवादीं धाःसा जनताया गणतन्त्र धइगु सामन्तवाद व वैदेशिक हस्तक्षेप मदुगु स्वाधीन गणतन्त्र नापं बहुदलयात स्वीकार याइगु गणतन्त्र खः धकाः स्पष्ट याःगु दु ।