मन्त्री भट्टराई जापानपाखे
नेपालय् जापानी मोडेलया विकास हइगु
जापानय् विकास जूगु 'वान भिलेज वान इण्डष्ट्री'या अध्ययन यायेगु निंतिं अर्थमन्त्री डा. बाबुराम भट्टराई कन्हय् जापान झायेत्यंगु खँ सीदुगु दु ।सूत्रं बिउगु जानकारी कथं डा. भट्टराईया लिसें मेपिं निम्ह जक उगु भ्रमण पुचलय् दुथ्याइ । वय्कः नापं मन्त्री भट्टर्राईया स्वकीय सचिव छम्ह व अर्थ मन्त्रालयया ल्याय्म्हम्ह योजनविद् छम्ह जक दुथ्याकूगु खँ नं सूत्रं धाःगु दु । भ्रमणयात म्हो खर्चालु दयेकेगु लागिं वय्कलं थःगु भ्रमण दलयात चीधं दयेकादीगु खः।
जापान भ्रमणया झवलय् डा. भट्टराईं जापान सरकारया प्रमुखयात नं नापलाइगु ज्याझवः दु । उगु इलय् वय्कलं जापान सरकारं नेपाःयात याये फइगु ग्वाहालि व नेपाःया वर्तमान राजनीतिक अवस्थाया बारे सहलह यानादीगु खँ धाःगु दु । वय्कःया थ्व भ्रमण मुक्कं न्यान्हुया जुइ ।
थ्वहे झवलय् सूत्रं बिउगु जानकारी कथं नेपाःया निंतिं जापानी राजदूतावासं नं नेपालय् 'वान भिलेज वान इण्डष्ट्री' लागू याये फइ वा मफइ धइगु विषयय् अध्ययन यानाच्वंगु दु । यदि नेपालय् नं उगु योजना लागू याये फत धाःसा याकनं विकास जुइगु बिचाः जापानी दूतावासं यानाच्वंगु दु । थ्वहे बिचाः कथं हे दूतावासं अर्थमन्त्रीयात जापान भ्रमण यायेत सःतूगु खँ नं सूत्रं धाःगु दु ।
सूत्रं धाः कथं नेपालय् थौंकन्हय् निजीस्तरं न्ह्यानाच्वंगु घरेलु उद्योग- यात हे 'वान भिलेज वान इण्डष्ट्री'या रुप बीगु बिचाः जापान सरकारं यानाच्वंगु दु । जापान च्वनाजःछि मन्त्री भट्टराईं जापानया थीथी घरेलु उद्योगया नं निरीक्ष्ँण यानादी ।
उखे नेपाःया स्वन्हुयंकंया भ्रमणय् झायाच्वंम्ह फिनल्याण्डया वैदेशिक व्यापार व विकास सम्बन्धी मन्त्री डा. पाभो भायरिननं नेपाःया अत्यावश्यक क्षेत्रय् लगानी यायेत फिनल्याण्ड इच्छुक जूगु खँ कनादीगु खः । वय्कलं प्रधानमन्त्री पुष्पकमल दाहाल 'प्रचण्ड'यात थौं सुथय् नापलायेगु झवलय् थ्व खँ धयादीगु खः । लिसें वय्कलं फिनल्याण्डं नेपाःयात याये फइगु ग्वाहालियात कयाः नं प्रमलिसे सहलह यानादीगु खः ।
