थौं भगवान रामयात लुमंकेगु राम नवमि

लव कर्माचार्य

दछिया छक्वः वइगु थीथी पर्व मध्ये राम नवमि नं छगू महत्वपूर्ण पर्व खः। पुलांगु मोहनि नापनापं बाय् चैत दशैंया कन्हय् कुन्हु थ्व पर्व लाइ। भगवान रामयात विष्णुया झिगू अवतार मध्ये ७ गूगु अवतार कथं माने यानातःगु दु। त्रेता युगय् सूर्यवंशय् रघुकुलया अयोध्या नगरय् जुजु दशरथया राजमहलय् जेठीम्ह लानि कौशल्यापाखें भगवान विष्णु पूर्ण अंश कयाः थ्वहे बसन्त इलय् चैत्र कृष्ण नवमि कुन्हु मध्यान्ह दिनय् श्री रामया रुपय् जन्म काःगु खः ।

राम छम्ह पुरुषया महापुरुष खः। हरिया अवतार कयाबिज्याःम्ह वसपोल ईश्वर नं खः। हरिया हरित वर्णया वसपोल नील वर्णम्ह खः ।

रामयात थीथी नामं पुकारे याइ। गथे कि राजाराम, जयराम, श्रीराम, किर्तनय् हरेराम नं धाःसा तिरिया नां न्ह्यःने तयाः सीताराम नं धाः। अथे हे रघु कुलयाम्ह जूगुलिं रघुनन्दन, दशरथपुत्र कथं दशरथ नन्दन व कौशल्या लानिया काय कथं कौशल्या-नन्दन नं धाः ।

रामया अनेक लीला दु। जुजु जनकया सभाय् सुना नं ल्ह्वने तकं मफुगु शिव धनुष ल्ह्वनाः सीतायात इहिपा याःगु, रावणया वध याःगु आदि भगवान रामया चर्चित लीला खः। रामं किशोर अवस्थांनिसें हे थीथी प्राणीया वध याःगु बाखं दु। सुवाहु, ताड्का, बाली, मारीच, कुम्भकर्ण, खरदूशन, रावण, ऐरावण, मैरावण आदि। रामया बाखं च्वयातःगु ग्रन्थयात 'रामायण' धाइ। अयोध्याय् जुजु रामं चले याःगु अतिकं न्यायपूर्ण राज्यया कारणं लोकय् बांलाःगु राज्ययात 'रामराज्य' धायेगु चलन हे दु ।

थौं रामनवमि कुन्हु भारतया अयोध्या, नेपाःया जनकपुर, येँ बत्तिसपुतलिया राममन्दिर, पचली पंचनारी च्वय् राम मन्दिर, न्हूघः, जोशीदेगः लिक्कया राम मन्दिर, भिंद्यः त्वालय् क्वय् च्वंगु राममन्दिरय् सुथंनिसें मेला थें पुजाआजा जुयाच्वंगु दु ।

More Stories Like this