जापानय् लुइकागु नेवाः वातावरण

ख्वप नगरपालिकापाखें न्ह्याकूगु जापानी भाषा तालिम कयाः जापान वनेगु अवसर चूलाकादीम्ह ख्वप वडा नं.-२ या मय्जु तुल्सीमैंया प्रजापतिं थः जापान च्वनागु इलय् नं नेवाः नखः चखः, नेवाः संस्कृति व नेवाः नसा ज्वलं छुयाला बजि हे दकलय् साःगु व यःगु अनुभूति कनादीगु दु। न्यादँ तक जापान च्वनाजःछि निक्वः हे जक नेपाः लिहां झाःम्ह वय्कः पर्यटन विषयय् अध्ययनया झ्वलय् अन च्वनादीगु खः। जापानया ओशाकाय् च्वनादीम्ह वय्कः आः थप दछि च्वनाः नेपाः लिहां वयाः थन हे पर्यटन ब्यवसाय चले यायेगु सोचय् दी ।

न्यादँ न्ह्यः ख्वप नगरपालिकां थीथी तालिम चले यायेगु झ्वलय् जापानी भाषा कक्षा नं न्ह्याकूगु खः। एसएलसी पास जुइ धुनेवं वय्कः उगु कक्षाय् सामेल जुयादिल। वयां लिपा छम्ह दाताया ग्वाहालिं वय्कः नापं तालिम काःम्ह पासा कमलकेशरी खर्बुजा नापं वय्कः जापानय् पर्यटन विषयय् अध्ययन यायेत झाःगु खः। अन अध्ययन नाप नापं ज्याथजिथिपिंत सुसाकुसा याइगु बृद्धाश्रमय् हेल्पर कथं ज्या नं यानादिल। जापानय् नं येँ, यल, बाग्लुङ नापं थीथी थासं वःपिं नेवाः मिस्त पासापिं दुगुलिं थन थें हे अन नं पारिवारिक वातावरणय् नेवाः भाय् हे ल्हानाः, म्हितेगु व न्हिलेगु ह्वःताः चूलानाः तुल्सीमैंयायात जापान नं नेपाः थें हे च्वन। थःपिं अन हे च्वनाः नं नेपाल संवत्या न्हूदँ हनेगु, म्हपुजा कुन्हु पासापिं जानाः मःमः दयेकाः नेवाः नसा ज्वलं नयेगु नापं नेवाः हुलाप्याखं व म्येँ हालाः न्ह्यइपुकेगु चलन दुगु खँ वय्कलं कनादिल ।

जापानय् च्वंगु नेवाः देय् दबू लगायत थीथी नेवाः संघ संस्था नाप प्रत्यक्ष संलग्नता मदुसां अन च्वनाच्वंपिं फुक्कं हे नेपाली थः थें जुइगु जुयाः म्ह्याय्मचा जूसां अन थःपिंत याकःचा महसुस मजूगु अनुभव कनादी। सुनिता महर्जन, दिना शाही थेंज्याःपिं नेवाः पासापिं नापं नेपाल संवत्या न्हूदँ म्हपुजाया छुट्टि कयाः नेवाः वसः पुनाः हुलाप्याखं हुलेगु व म्ये हालेगु इलय् थः जापानय् दु कि नेपालय् दु धइगु हे मचायेगु नं वय्कलं कनादिल ।

जापानीत चय्दँ गुइदँ तक म्वाइगु धइगु सामान्य खः। अन हे फुफुगु ज्या यानाः नं थःपिं रिटायर जीवन हनाच्वनी। काय् म्ह्याय्पिं इहिपा जुइवं अलग्ग जुइगु जुयाः सुयागुं निर्भर जुइ मखु ।

सरकारं हे नयेगु, त्वनेगु व पुनेगु बन्दोबस्त याना बी। ७०/८० दँ दुपिंत ला ल्याय्म्ह हे धायेमाः। दाइ वा कका धइगु जापानी खँग्वः छ्यलाः संवोधन यात धाःसा सुया कका, छुकिया कका धकाः ल्वाः वइ। दैनिक रुपं हे थःपिनि स्वास्थ्य प्रति ख्याल याइपिं जुयाः उपिं तसकं हे स्वस्थ। क्वाःगु लखय् लुकुंबिया च्वनेगु, पिहां वयाः ख्वाउँ लः यक्व त्वनेगु व हाकनं अन हे च्वनेगु उमिगु सुथसिया नित्य कर्म खः। गुलिसियां 'त्वामि' धाःगु हिटर थें क्वःगु थलय् च्वनाः चःति वयेकी। वयां लिपा रुमालं चःति हुयाः स्वस्थ जुयाच्वनी ।

तःमि व चीमिया भेदभाव मतसे सकसियां छताजि हे जा नइ। जा प्याकेजय् वइ। आम्दानी कथं सरकारं कर कटे यानाः तिनि तबल बी। बेरोजगार भत्ताया ब्यवस्था दु। 'होमलेस'त नं नये मखंपिं दइ मखु। उमित नं ज्या मदुतले सरकारं हे नयेगु ब्यवस्था यानाः बेरोजगार भत्ता बिया तइ। विरामी जूसा वा घाःपाः जूसा थाय् स्वयाः निजी डाक्टरया ब्यवस्था दइ ।

जापानं लिहां वया कथं तुल्सीमैंया थःगु छेँय् थ्यंबलय् न्हिनय् मत सिनाच्वंगु खनाः अजू चायादिल। जापानय् मत सीगु धइगु रेकर्ड हे मदु। अन च्वनाः लिहां वःम्ह तुल्सीमैंयायात थःगु छेँ न्हापा स्वयां चिब्याना च्वं थें तसकं हे खिउँसे च्वं थें छु थें गथे थें महसुस जुयाः म्ह हे सुख मदयाच्वनी ।

'यदि जापानीत थें चांन्हिं दुःख सियाः ज्या यायेगु खःसा नेपाः नं अथे विकसित देय् जुइकेत उलि ई काइ मखु जुइ।' वय्कलं थःगु न्यादँ ताःहाकःगु जापानी जीवनं बिदा कयाः नेपालीनाप हे इहिपाः यायेत थन वयेगु झ्वलय् कनादिल ।

More Stories Like this