शीर्ष नेतातय् गोप्य सहमति !

सभासदतय्सं हे मसीक संविधानसभाय् ह्विप जारी ऐन वल

येँ (सन्ध्या टाइम्स)/आः तक संसारय् गनं हे मजूनि कथं संविधानसभाय् नं राजनीतिक दलतपाखें ह्विप जारी याये दइगु प्रावधान सहितया ऐन सरकारं दयेकूगु दु ।

म्हुतुं धायेबलय् संविधानसभा धइगु जनताप्रति उत्तरदायी जुइमाः धया जुइपिं नेतातय्सं मनय् धाःसा मेता हे बिचाः तयाः ज्या यानाच्वंगु खँ थुगु ह्विप सम्बन्धी ऐन वःगुलिं पुष्टि जूगु दु ।

संविधानसभाय् नं दलयागु ह्विप लागू यायेगु खँय् अघोषित रुपं संविधानसभाया मू मू राजनीतिक दलया शीर्ष नेतातय् दथुइ गोप्य सहमति जुयाः थुगु ह्विप लागू यायेगु खँ दुथ्याकाः ऐन हःगु खँ सूत्रं धाःगु दु ।

संविधानसभां छखे नियमावली दयेकाः संविधानसभाय् ह्विप लागू जुइ मखु धकाः क्यनातःगु दुसा मेखे संविधान जारी यायेत छुं ई जक ल्यं दनिगु इलय् वयाः संविधानसभाय् ह्विप लागू जुइगु ऐन सर्वसहमतिं पारित याःगु दु। संसदीय व्यवस्थाय् नियमावली सिबें च्वय् ऐन लाइ ।

दलया नेतात चलाख जुयाः नियमावलीइ सभासदतय्सं मतदानया इलय् थःपिनि विवेक छ्यले दइ धकाः ह्विप जारी मजुइगु खँ न्ह्यथना तःसां ऐनय् धाःसा उकिया अःखः ह्विप लागू जुइगु खँ धयातःगु दु। संविधानसभाय् छुं नं छगू पार्टीया दुई तिहाई बहुमत मदुगु नापं सहमतिया नामय् न्ह्यागु नं खँ त्वःतेत ज्या छिंकेगु निंतिं उगु कथंया दलीय ह्विपया ऐन हःगु खयेमाः धकाः नं थन अनुमान यानाहःगु दु ।

मेखे संविधानसभाय् ह्विप माने मयाइपिंत सभासद पदं हे चीके फइगु प्रावधान न्हापा हे तयेधुंकूगु दु। आदिवासी जनजाति, मधेशी व मिसापिनि मुद्दाय् सम्बन्धित जातिया सभासद्तय्सं पार्टीया लाइन विपरित थःथःपिति जातीय अधिकारया लागिं भोट बी फइगु खँयात ध्यानय् तयाः अथे मजुइकेगु लागिं उमित पार्टीया ह्विप लगे जुइगु ऐन हःगु दावी नं छगू सूत्रं याःगु दु। थ्व ऐनया कारणं यानाः थःथःपिनि जातीय अधिकारया निंतिं पार्टी दुने ल्वायेमाःसां ल्वाये धकाः जनजाति सभासद्त जानाः दयेकूगु 'ककस'या नं अर्थ मदयेफु धाःगु दु ।

माओवादीया निम्हतिपू नेताया भूमिका
संविधानसभाय् दलया ह्विप लागू याये मजिउ धकाः दकलय् अप्वः सः तयादीम्ह माओवादीया जनजाति नेता नापं सभासद देब गुरुङ मन्त्री जुयाच्वंगु इलय् वय्कलं हे ह्विप लागू मजुइगु नियमावली वये स्वयां न्ह्यः ह्विप लागू जुइगु ऐन संसदय् न्ह्यब्वयादीगु खः। गणतन्त्र शुद्धीकरण सम्बन्धी ऐनय् थ्व ह्विप जारी यायेगु खँ न्ह्यथनातःगु दु। संसदं उगु ऐन सर्वसहमतिं पारित याःगु जूसां अप्वः सभासदतय्सं उगु ऐन पारित जूगु हे थःपिंसं मसिउ धयाच्वंगु दु। संसदं पारित याःगु जूसां च्वयेगु इलय् ऐन संविधानसभां पारित जुल धकाः च्वइगु प्रावधान दु। उगु ऐनया प्रस्ताव व्यवस्थापिका संसद विधेयक समितिया सभापति गुरुङया हे जहान सभासद यशोधा सुवेदी खः। वय्कः सुवेदीया हे नेतृत्वय् दुगु समितिं ऐनया प्रस्ताव पारित यानाः संसदय् न्ह्यब्वःगु खः ।