कोइराला मदयाः थौं नं राष्ट्रिय शोक
संविधानसभाय् आः कोइरालाया थासय् सुजाता वनीगु
येँ (सन्ध्या टाइम्स)/शीर्ष नेता गिरिजाप्रसाद कोइराला मदुगु दुःखय् थौं नं देय्न्यंकं राष्ट्रिय शोक माने यानाच्वंगु दु। थौं नेपाःया राष्ट्रिय ध्वाँय् बछि क्वछुकूगु दुसा नेपाली कांग्रेसया ध्वाँय् नं क्वछुकूगु दु। कांग्रेसया ज्याकू न्हय्न्हु बन्द यायेगु निर्णय याःगु दु ।
मदुम्ह कोइरालायात श्रद्धांजलि प्वंकेगु लागिं थीथी देय्या नेपाली राजदूतावासय् शोक पुस्तिका नं तयातःगु दु। म्हिगः पशुपति आर्यघाटय् मदुम्ह कोइरालाया अन्तिम संस्कार याःगु खः ।
मदुम्ह कोइरालायात थौं संविधानसभाया बैठकं नं श्रद्धांजलि प्वंकेगु ज्या जुइत्यंगु दु। कोइरालाया अन्तिम संस्कारया नापनापं आः नेपाली कांग्रेसय् सभापति पदय् सु च्वनेगु धकाः नं चर्चा शुरु जूगु दुसा कोइराला पुत्री सुजाताया कारणं वर्तमान माधव नेपालया सरकारयात नं संकट वयेफुगु अनुमान थन याना हःगु दु ।
सुजाता कोइरालां थः नं संविधानसभाय् दुहां वनेगु लागिं तःधंगु हे कुतः याना वयाच्वंगु खः। उकिया लागिं वय्कलं झापाया सभासद् शंकर ताजपुरियायात इनाप नं यानादीगु खः। तर आः भाजु कोइराला मदयेवं संविधानसभाय् खाली जूवंगु सीटय् वय्कःया हे म्ह्याय् सुजातायात मनोनित याइगु लगभग निश्चित दु। संविधानसभाय् सुजाता दुहां वनेवं हे वय्कलं प्रधानमन्त्री जुइगु महत्वाकांक्षी पलाः न्ह्याकीगु सम्भावना दु। वय्कःया उगु पलाःयात माओवादीं समर्थन याइगु नं उतिकं सम्भावना दु छाय्धाःसां माओवादीयात न्ह्याथे यानाः नं माधव नेपालया सरकार क्वःथलेमाःगु दु। अले भारतं नं माओवादी दुथ्याःगु सरकार सुनां दयेकी वयात समर्थन याये धयातःगु दु ।
उखे कांग्रेस दुने आः शक्ति समीकरण मिले यायेगु लागिं नं छगू गुटयात सभापतिसा मेगु गुटयात प्रधानमन्त्री बियाः सन्तुलन कायम याये मालीगु अवस्था वयेफु ।
कोइराला मदयेवं जुइफुगु थ्व सम्भावनायात ध्यानय् तयाः थौं एमाले स्थायी समितिया बैठक नं च्वंगु दु ।
