देशय् शान्ति दुसा जक वय्कःयात चिरशान्ति

नेपाःया समसामयिक राजनीतिया शीर्ष पुरुष धकाः च्वछायातःम्ह पुलांम्ह प्रधानमन्त्री गिरिजाप्रसाद कोइरालाया निधनयात मनूतय्सं 'कांग्रेस सभापति' या अवसान धकाः मकाः। थ्व वय्कःया नेतृत्वयात राष्ट्रं स्वीकार याःगुया चिं खः। वय्कः मदयेधुंकाः मिडियाय् वयाः थःगु बिचाः प्वंकादीपिं फुक्क धइथें नेतातय् धापू न्यनेगु खःसा निष्कर्ष छगू हे जक पिहां वइ, कोइरालां देशय् शान्ति स्थापनाया लागिं याना थकूगु कुतः अझं पूमवंनि, उकियात पूवंकेगु खःसा आः गुगुं छगू राजनीतिक दलया नेता जक जानाः मखु फुक्क हे दलया फुक्कं नेतात जानाः ज्या याये माःगु आवश्यकता दु। माओवादी, कांग्रेस, एमाले लगायतया नेतातय्सं आः कोइरालां शुरु याना थकूगु शान्ति प्रक्रियायात पूर्णता बीगु खःसा सकलें दल व नेतातय् दथुइ 'एकता, सहमति व सद्भाव' मदयेकं मगाः धइगु अभिव्यक्ति बिउगु दु। कोइराला मदये सातकि हे फुक्कं दलया नेतातय्सं थज्याःगु एकता व सहमतिया आवश्यकतायात अझ नुगलंनिसें महसुस यानाहःगु धाथें नं सकारात्मक खँ खः। डा. बाबुराम भट्टराईनं धयादी थें आः देशय् कोइराला ति उचाई दुम्ह याकः व्यक्तित्व सुं नं मदु। उकिं आः थन धाथें शान्ति हयेगु खः व देय्यात उन्नतिया लँपुइ यंकेगु खःसा ल्यं दनिपिं फुक्कं नेतात मिले जुयाः कोइरालां दथुइ त्वःता थकूगु ज्यायात पूर्णता बीमाः। देशय् पूर्ण शान्ति वःसा हे जक कोइरालाया 'आत्मा'यात नं चिरशान्ति दइ। कोइरालायात चिरशान्ति दयेमा धयां जक वय्कःयात शान्ति दइगु मखु। थौं वय्कः मदयेधुंकाः नेतातय्के वःगु एकताया चेत 'मसान दर्शन' जक जुयाः मफुइमा, थ्वहे झीसं कामना याये ।

More Stories Like this