थौं राजकीय अन्त्येष्टि

कोइराला मदयाः मुक्कं देय् शोकाकुल

येँ (सन्ध्या टाइम्स)/नेपाली राजनीतिया शीर्षपुरुष, पुलांम्ह प्रधानमन्त्री नापं नेपाली कांग्रेसया सभापति गिरिजाप्रसाद कोइराला म्हिगः न्हिनय् १२.१० बजे मंत। थौं वय्कःया अन्त्येष्टि याइगु ग्वसाः दु। अन्त्येष्टि न्ह्यः वय्कःया शवयात सुथय् ९ बजेनिसें दशरथ रंगशालाय् अन्तिम श्रद्धांजलिया लागिं तयातःगु दु ।

अन हे थौं प्रधानमन्त्री माधव नेपालं वय्कःया सीम्हय् नेपाःया राष्ट्रिय ध्वाँय् फायेकादीगु दु। कोइरालायात थौं अनं शवयात्रा यानाः यंकुसें पशुपति आर्यघाटय् अन्तिम संस्कार याइगु ग्वसाः दु। देय्या राष्ट्राध्यक्ष समेत जुइधुंकूगु कारणं वय्कःयात अन सेनापाखें १३ तोपया सलामी नं बीगु ज्याझ्वः दु। वय्कःया सीम्हय् मि तयेगु ज्या धाःसा वय्कःया हे याकःम्ह्याय् सुजाता कोइरालां यानादी ।

वय्कःया शवयात रंगशाला यंके न्ह्यः सुथय् पार्टीया केन्द्रीय ज्याकू सानेपाय् हे यंकाः पार्टीया नेतातय्सं श्रद्धाञ्जली प्वंकूगु खः। नेपाली सेनाया गाडीइ तयाः पार्टीया केन्द्रीय ज्याकुथी सीम्ह यंकूगु खःसा अन पार्टीया वरिष्ठ नेतात शेरबहादुर देउवा, शुशिल कोइराला, रामचन्द्र पौडेल नापं थीथी केन्द्रीय नेतातय्सं श्रद्धाञ्जली प्वंकू खः। अनं लिपा सीम्ह तयाहःगु गाडी बल्खु, कुलेश्वर, कालिमाटी जुयाः दशरथ रंगशालाय् यंकूगु खः ।

दशरथ रंगशालय् थीथी राजनीतिक दलया नेता, मन्त्रीपिं, कुटनीतिक नियोगया मनूत, संचारकर्मी व सर्ववसाधारणं श्रद्धांजलि प्वंकूगु खः ।

अन मुनाच्वंपिं द्वलंद्वः मनूतय्सं 'गिरिजाबाबु अमर जुइमा, गिरिजाप्रसाद कोइराला जिन्दाबाद' धकाः नारा थ्वयेकूगु खः। दशरथ रंगशालाय् हे प्रधानमन्त्री माधवकुमार नेपाल, एनेकपा (माओवादी)या नायः प्रचण्ड, नेतापिं डा. बाबुराम भट्टराई, नारायणकाजी श्रेष्ठ, सभामुख सुवास नेम्वाङ, संयुक्त राष्ट्रसंघया आवासीय प्रतिनिधि रोबर्ट पाइपर, प्रधानसेनापति नापं मेमेपिंसं श्रद्धाञ्जली प्वंकादीगु खः ।

अन्तिम श्रद्धाञ्जली प्वंकेगु निंतिं सरकारं हे दशरथ रंगशालाय् ब्यवस्था याःगु खः। दशरथ रंगशालाय् थौं सुथंनिसें हे श्रद्धाञ्जली प्वंकेगु नितिं द्वलंद्वःम्ह मनूत थ्यन। सरकारं दशरथ रंगशालाय् दुहां वनेगु नितिं स्वंगू झ्वःया व्यवस्था याःगु दु। अन कांग्रेस पार्टी, नेपाल तरुण दल व नेपाल विद्यार्थी संघ नापं पार्टीया थीथी भ्रातृ संगठनया ध्वाँय् तयातःगु दु। सरकारं थौं सार्वजनिक बिदा घोषणा नं याःगु दु ।

मदुम्ह कोइरालाया सिथं यंकेगु निंतिं थौं दशरथ रंगशालां पशुपतिया आर्यघाटय् यंकेगु रुट तयार याःगु दु। रुट कथं सनिलया २ बजे दशरथ रंगशालां लुँहिति, रत्नपार्क, बागबजाः, पुतलिसडक, डिल्लीबजाः, मैतिदेबी, पुलांगु बानेश्वर, बत्तिसपुतली, गौशाला जुयाः पशुपति आर्यघाट यंकी ।

उखे कोइराला मदयेवं वय्कःया गृह जिल्ला विराटनगर बजाः स्वतस्फूर्त रुपं बन्द जूगु दु। वय्कः मदुगु खबर वयेवं हे म्हिगःनिसें अन बजाः बन्द जूगु खः। थौं येँय् नं सर्वसाधारण जनताया पसः व बजाः बन्द जुयाच्वंगु दु ।

लिसें संघीय लिम्बुवान राज्य परिषदं बन्द यानातःगु अरुण पूर्वया गुंगू जिल्लाया ज्याझ्वः नं थनिंनिसें लित काःगु दु। पुलांम्ह प्रम कोइराला मदुगुलिं आःया निंतिं बन्द ज्याझ्वः लित कयागु खँ परिषदं धाःगु दु। थौं जुइमाःगु पीन्याक्वःगु अन्तर्राष्ट्रिय जातिभेद उन्मुलन दिवसया ज्याझ्वः नं स्थगित याःगु दु। दँय्दसं मार्च २१ कुन्हु नेपाःया आदिवासी जनजाति नापं दलिततय्सं उगु दिवस हना वयाच्वंगु खः ।