त्वःता थकूगु न्ह्यसःत

विशेष संपादकीय

नेपाली कांग्रेस दुने जक मखु समग्र नेपालय् हे २०४६ सालंनिसें एकछत्र राज याना वयाच्वंम्ह शीर्षपुरुष गिरिजाप्रसाद कोइराला म्हिगः आकाझाकां मदयेवं मुक्कं देय् धाथें हे शोकमग्न जूगु दु। शुरुइ परिवारवाद, वामपन्थी विरोधी आदि आदि कथंया द्वपं लानाच्वंम्ह खःसां लिपांगु इलय् वयाः नेपाःया छम्ह राष्ट्रिय नेताया रुपय् हे उदय जुयाच्वंम्ह भाजु कोइरालाया म्हिगः ८६ दँया वैंशय् निधन जुइवं नेपाली राजनीतिइ अनेक कथंया न्ह्यसःत पिहां वःगु दु। खास यानाः वय्कः मदयेधुंकाः आः देशय् न्ह्यानाच्वंगु शान्ति प्रक्रिया छु जुइगु खः? जेष्ठ १४ गते जारी यायेगु धकाः तयारी यानाच्वंगु न्हूगु नेपाःया संविधान छु जुइगु खः? थीथी गुट उपगुटय् विभाजित जुयाच्वंगु नेपाली कांग्रेसया आन्तरिक राजनीति छु जुइगु खः? आदि आपालं यक्षप्रश्न त्वःताः महानायक कोइराला महा यात्रापाखे प्रस्थान जुयादीगु दु ।

धाथें धायेगु खःसा थःगु सम्पूर्ण राजनीतिक जीवनय् देशय् कोइराला हे मदयेक मगाःगु ई धइगु थौंया हे ई खः। थ्व स्वयां न्ह्यः भाजु कोइराला गुलि नं पटक देशया प्रधानमन्त्री जुयादिल व वय्कःया आवश्यकता जुयाः जूगु मखु। उकिया लिउने मेमेगु हे राजनीतिक जोडघटाउया कासात दु। तर विडम्बना छु जुल धायेबलय् थौं देशं कोइरालाया नेतृत्व अति व्यग्रपूर्वक आवश्यक महसुस यानाच्वंगु इलय् वय्कःया निधन जूगु दु। अथे जुयाः नं वास्तवय् वय्कःया निधन नापंनापं देय्या राजनीतिइ थुपिं न्ह्यसःत जन्म जूगु खः।
यदि कोइराला लिपाया नेतातय्सं थुपिं न्ह्यसःया पाय्छि लिसः माला वने फत धाःसा कोइराला प्रति धाथेंया श्रद्धांजलि प्वंकूगु नं जुइ अले वय्कःया म्हगस पूवंकेगु पलाः न्ह्याकूगु नं जुइ। अथे मयासे थुपिं न्ह्यसःया दथुइ हे तना वनेगु ज्या जुल धाःसा उकिं नेपाःया राजनीतियात आः स्वयां नं खतरनाक मोडय् यंकाः छ्वावाना बीगु नं निश्चित दु ।

थ्व राष्ट्रिय शोकया घडीइ मदुम्ह कोइरालाप्रति दुनुगलंनिसें श्रद्धांजलि प्वंकुसें दुःखं क्यंपिं छेँजःपिंत बिचाः हायेके अले शोकयात शक्तिइ हिलाः न्हूगु नेपाः दयेकेगु लँपुइ सकलें न्ह्याये धकाः प्रण याये ।

More Stories Like this