आन्दोलनया उपलब्धी विरुद्धया मोर्चात

२०६२/६३ या जनआन्दोलन ब्व २ पाखें देय्यात आः तक प्राप्त जूगु उपलब्धी धइगु राजतन्त्रया अन्त्य यासें गणतन्त्रया पलिस्था, धर्म निरपेक्षता व संघीय व्यवस्थाय् वनेगु प्रतिवद्धता खः। तर विडम्बना, आन्दोलन व द्वलंद्वः मनूतय् बलिदानं प्राप्त जूगु थ्व स्वंगुलिं उपलब्धीयात ध्वस्त यायेगु लागिं आः थीथी मोर्चा व कोणं कुतः शुरु जूगु दु। गणतन्त्र मदयेकेगु लागिं ला स्वयं पुलांम्ह जुजु ज्ञानेन्द्र व पुलांपिं खाँट्टी पंचत लगे हे जुयाच्वंगु जुल। धर्म निरपेक्षता मदयेकेगु लागिं भारतपाखें थीथी नामधारी बाबात नेपाः वया: होम यज्ञादि यासें पुलांपिं दरवारिया व बहुदलीय व्यवस्थाया भ्रष्ट नेतातय्त छगू हे थासय् मुंकेगु कुतः जुयाच्वंगु दु। अले संघीय व्यवस्था मदयेकेगु लागिं आः नकतिनि हे मशालया नेता चित्रबहादुर केसीया अध्यक्षताय् एमाले व कांग्रेसया समेत ब्राम्हणवादी नेतातय् बथान मुंकेगु ज्या सम्पन्न जूगु दु। गणतन्त्र, धर्म निरपेक्षता व संघीय व्यवस्थायात संस्थागत यायेगु लागिं थुकिया समर्थक शक्तित संविधानसभाय् व्यस्त जुयाच्वंगु थ्व मौका लाकाः उमिसं त्वःता थकूगु सतकयात आः न्हूगु नेपाःया प्रतिगामी शक्तितय्सं कब्जा यायेगु कुतः यानाच्वंगु दु। वास्तवय् माओवादीं सरकार व संसद जक मखु सतक नं थःपिंसं हे कब्जा याना तयेमाः धकाः धाइगु थ्वहे कारणं खः। छाय्धाःसां अग्रगामीतय्सं सतक त्वःतल धाःसा उगु खाली थाय् प्रतिगामीतय्सं कायेत स्वइगु जुयाच्वन ।

पंचायतकालय् प्रतिकार समूह गठन याये थें आः गठन याःगु संघीयता विरोधी समिति, हिन्दू राष्ट्रवादी मण्डले व पारस शाहया तलबः फ्यइपिं तत्वतय्त न्हूगु संविधानं सखाफ याना छ्वयेमाःगु आवश्यक दु ।

More Stories Like this